АҚШ разведка раҳбари яширинча Москвага борганининг сабаби очиқланди

АҚШ Марказий разведка бошқармаси (МРБ) директори Жон Ли Рэтклифф Россия расмийларини НАТО давлатларига, хусусан, Эстония, Латвия ва Литвага ҳужум қилишдан огоҳлантириш учун Москвага боргани маълум бўлди. Бу ҳақда “Politico” хабар берди.

Аввалроқ, Рэтклифф жорий йилнинг 25 август куни Москвага олдиндан эълон қилинмаган ташриф билан борган эди. Нашр Рэтклифф нима сабабдан Россияга борганини очиқлаган бўлсада, унинг Москвада айнан ким билан учрашгани ҳақида маълумот бермаган.

“Учрашув, биринчи навбатда, Россияни Болтиқбўйи давлатларига қарши ҳар қандай кескинлашувдан огоҳлантиришга қаратилган эди”, деган “Politico” манбаларидан бири.

Нашр манбасига кўра, МРБ раҳбари Москва расмийларидан Эронга ҳарбий ва иқтисодий ёрдам кўрсатишни тўхтатишни ҳам талаб қилган.

АҚШ Президенти Дональд Трамп МРБ раҳбарининг Россияга ташрифини “қандайдир ярим одатий сабаб” билан амалга оширилган деб атаган. У Рэтклифф Россияга Путин НАТОнинг қатъиятини “синаб кўрмоқчи” экани сабабли юборилганини рад этган.

Аввалроқ, август ойининг бошида Путин яқин бир неча йил ичида НАТОнинг қатъиятини синаб кўришга уриниши мумкинлиги ҳақида хабар берилган эди. Бунинг учун альянснинг бирор давлатига чекланган ҳужум уюштирилиши мумкинлиги тахмин қилинган.

Эслатиб ўтамиз, аввалроқ Россия Президентининг матбуот котиби Дмитрий Песков АҚШ Марказий разведка бошқармаси (МРБ) директори Жон Ли Рэтклиффнинг Москвага ташрифи икки мамлакат махсус хизматлари ўртасидаги алоқалар билан боғлиқ бўлганини маълум қилган эди. Шунингдек, у Рэтклиффнинг Владимир Путин билан учрашуви бўлмаганини айтганди.