АҚШ пойтахтида тартибсизликлар сабабли комендантлик соати жорий этилди

north_east

АҚШ миллий гвардияси Миннеаполис шаҳрини қандай “тозалаётгани” видеоси эълон қилинди

Қора танли Жорж Флойд полиция томонидан ўлдирилишидан сўнг келиб чиққан тартибсизликлар туфайли АҚШ пойтахти Вашингтон шаҳрида комендантлик соати жорий қилинди. Комендантлик соати 1 июнь куни маҳаллий вақт билан 19:00 да бошланди ва икки кун давомида амалда бўлади. Бу ҳақда CNN нашри хабар берди.

Нью-Йорк мери Билл де Блазио ҳам шаҳарда комендантлик соати жорий этиш имкониятини кўриб чиқмоқда.

"Биз ушбу имкониятни ўрганиб чиқишимиз керак", дейди Нью-Йорк мэри.

Блазио яқин соатларда ушбу вариантни муҳокама қилишини таъкидлади.

Шу ҳафта охирида АҚШдаги 40 та шаҳарда норозилик намойишларига жавобан комендантлик соатлари жорий этилди. Миннеаполис, Атланта, Лос-Анжелес, Сиетл, Чикаго, Филадельфия, Питтсбург шулар жумласидандир

Маълумот учун, афро-америкалик Жорж Флойднинг ўлими бутун мамлакат бўйлаб тартибсизликларни келтириб чиқарди. Флойд 25 май куни Миннеаполисда полиция ходими томонидан ушланди. Ҳибсга олиш пайтида полициячи Флойднинг бўйнини тиззаси билан босиб, бўғиб қўйди. Кейинчалик Флойд реанимацияда вафот этди ва унинг ҳибсга олинганлиги ҳақидаги видео Интернетда тарқалди. Шундан сўнг, АҚШнинг кўплаб шаҳарларида тинч намойишлар полиция билан тўқнашувларга айланиб кетди.

Тартибсизликлар Оқ уйгача етиб келди. АҚШ Президенти Дональд Трамп ушбу вақтда бункерга олинди. Шунингдек, намойишлар Европага ҳам етиб борди. Лондон ва Берлин аҳолиси кўчаларда тўпланишди. Улар ҳукуматдан полиция ҳуқуқларини чеклашни талаб қилмоқда.