АҚШ Хитойга босимни кучайтирмоқчи – ОАВ

АҚШнинг демократлар ва республикачилар партиясидан бўлган бир гуруҳ сенаторлари шу ҳафта Хитойга нисбатан босимни кучайтиришга қаратилган учта қонун лойиҳасини Конгрессга тақдим этади. Бу ҳақда “Reuters” агентлиги хабар берди.

Қонун лойиҳаларининг мазмуни қуйидагича:

• Уйғурларни мажбуран депортация қилишда иштирок этган Хитой амалдаги ва собиқ амалдорларига АҚШга киришни тақиқлаш. Улар “инсон ҳуқуқларини бузишда” айбланмоқда.
• Тайвань билан дипломатик алоқаларни сақлаётган Лотин Америкаси ва Кариб ҳавзасидаги мамлакатларга кўмак бериш. Қонун лойиҳасида Тайбей билан ҳамкорликни чуқурлаштириш бўйича чоралар назарда тутилган.
• Халқаро репрессияларга қарши курашишга қаратилган ҳужжат. Бу Хитой ҳукуматининг хориждаги танқидчиларига босим ўтказиши билан боғлиқ таҳдидларни жиловлашни мақсад қилади.

Шунингдек, агентликнинг қўшимча қилишича, АҚШ ва Хитой келаси ҳафта Стокгольмда амалдаги савдо битимларини узайтириш масаласида музокаралар ўтказади. Қайд этилишича, АҚШ Президенти Дональд Трампнинг савдо масалаларига урғу бераётгани Конгрессдаги “қаттиққўл” сенаторлар – яъни “хавфсизлик тарафдорлари” орасида хавотир уйғотмоқда. Улар хавфсизлик масалалари четга сурилиб, фақат иқтисодий манфаатлар кўзда тутилаётганидан норози.

Эслатиб ўтамиз, 2024 йилги сайловолди тадбирлари чоғида АҚШ Президенти Дональд Трамп ҳомийларга Хитой Тайванга бостириб кирса, АҚШ “Пекинни бомбардимон қилиши” билан таҳдид қилгани ҳақида хабар берилганди.