АҚШ Хитой товарларига 104 фоизлик бож жорий қилди

АҚШ Хитойдан олиб кириладиган маҳсулотларга 104 фоизлик импорт божи жорий этишга қарор қилди. Бу ҳақда Оқ уй матбуот котиби Кэролайн Ливиттга таяниб, CNN хабар берди.

Унинг сўзларига кўра, 9 апрелдан бошлаб Хитойдан импорт қилинадиган маҳсулотларга қўшимча 84 фоизлик бож қўлланади. Шу тариқа, Хитой маҳсулотларига нисбатан умумий бож ставкаси 104 фоизни ташкил этади.

Бунгача АҚШ расмийлари Хитой 8 апрель куни пешингача АҚШ маҳсулотларига нисбатан 34 фоизлик божни бекор қилмаса, унга нисбатан бож ставкалари кўтарилишини билдирган. Хитой эса белгиланган муддатгача бу божни бекор қилиш ҳақида эълон қилмаган.

Шу боис Вашингтон 2 апрель куни мамлакат Президенти Дональд Трамп томонидан эълон қилинган 20 ва 34 фоизлик бож ставкаларига қўшимча равишда яна 50 фоизлик бож жорий қилмоқда.

Қайд этиш жоиз, олдинроқ Дональд Трамп ўзининг Truth Social ижтимоий тармоғида агар Пекин аввалроқ эълон қилинган қарши чоралардан воз кечмаса, Вашингтон 9 апрелдан Хитойга қарши қўшимча 50 фоизлик божлар жорий қилишини ёзган эди. Кейинроқ Хитой Савдо вазирлиги АҚШ Президенти Дональд Трампнинг Хитой импортига қўшимча 50 фоизлик бож киритиш таҳдидини “хато ортидан хато” деб атади.

Эслатиб ўтамиз, 2 апрель оқшомида Оқ уй боғида чиқиш қилган Трамп АҚШга импорт қилинадиган маҳсулотларнинг аксарига 10 фоизлик тарифлар, Хитой учун эса қўшимча 34 фоизлик, Европа Иттифоқи учун эса 20 фоизлик божлар жорий этилишини эълон қилди. Оқибатда АҚШнинг импорт бўйича ўртача бож ставкаси 2024 йилдаги 2,5 фоиздан 22 фоизга ошди – бу кўрсаткич охирги марта 1910 йиллар атрофида кузатилган.