АҚШ Канада товарларига 50 фоизлик бож жорий қилди

АҚШ савдо музокаралари муваффақиятсиз якунланганидан сўнг Канаданинг айрим товарларига 50 фоизлик бож жорий қилди. Бу ҳақда “Reuters” хабар берди.

Қайд этилишича, янги тарифлар бугун, 22 август куни ярим тундан кучга кирган ва қиймати қарийб 20 миллиард долларлик Канада товарларига тааллуқли бўлган. Ушбу сумма Канаданинг АҚШга экспортининг 5 фоиздан бироз кўпроғини ташкил этади.

Тарифлар АҚШ Президенти Дональд Трамп ва Канада Бош вазири Марк Карни ўртасидаги муносабатларда кескинликни янада кучайтириши кутилмоқда. Шунингдек, бу қарор АҚШ, Мексика ва Канада ўртасидаги эркин савдо келишувини янгилаш бўйича кенгроқ музокараларни мураккаблаштириши мумкин.

Маълум қилинишича, Карни АҚШ билан савдо музокараларини тўхтатганини ва Канада янги тарифларга долларма-доллар жавоб беришини билдирган. У Вашингтоннинг музокараларнинг сўнгги босқичида таклиф шартларини ўзгартирганини адолатсиз ва иқтисодий жиҳатдан асоссиз деб баҳолаган.

Музокаралардан бир неча соат олдин икки давлат келишувга яқинлашгани айтилган эди. Манбаларга кўра, келишув пўлат, алюминий ва автомобилларга қўйилган тарифларни пасайтириш ҳамда АҚШ алкоголли ичимликларини Канада дўконларига қайта киритиш имконини бериши мумкин эди.

АҚШ савдо вакили Жеймисон Грир эса Канада аввал келишилган шартлар асосида савдо келишувини якунлашдан бош тортганини айтди. Унинг таъкидлашича, бу Канада учун АҚШ билан ҳамкорлик қилиш имкониятини бой бериш бўлган.

Янги тарифлар АҚШ, Мексика ва Канада ўртасидаги эркин савдо келишуви доирасида имтиёзли шартларга эга бўлмаган товарларга нисбатан қўлланади. Савдо мутахассислари бундай чоралар Канада иқтисодиётининг айрим заиф тармоқларига жиддий зарар етказиб, иш ўринлари қисқариши ва корхоналар ёпилишига олиб келиши мумкинлигидан огоҳлантирган.

Янги божлардан ташқари, АҚШ Канада пўлати, ёғоч материаллари ва автомобилларига нисбатан аввалдан мавжуд тарифларни ҳам сақлаб қолмоқда. Ушбу тармоқлар сўнгги 18 ойда АҚШ савдо чораларидан сезиларли зарар кўрган.

Эслатиб ўтамиз, аввалроқ АҚШ Президенти Дональд Трамп 80 дан ортиқ давлатдан импорт қилинадиган маҳсулотларга нисбатан янги бож ставкаларини жорий қилганди.