АҚШ Эроннинг тинчлик режасини рад этди

АҚШ Эроннинг урушни тўхтатиш бўйича таклифларини рад этди. Теҳроннинг билдиришича, Вашингтон аввалгидек босим ўтказиш позициясини сақлаб қолган. Бу ҳақда “Tehran Times” хабар берди.

Қайд этилишича, АҚШ Эрон томонидан урушни тўхтатиш учун тақдим этилган 14 банддан иборат режани инкор қилган. “Tehran Times” маълумотларига кўра, Теҳрон ўзининг ёзма таклифига Вашингтондан расмий жавоб олган. 

Нашрнинг ёзишича, Америка томони Эроннинг барча ташаббусларини рад этган ва айниқса, Эрон ядро дастури масаласида ўз қатъий позициясини сақлаб қолган.

Хабарда алоҳида қайд этилишича, агар ушбу таклифлар қабул қилинганида, Теҳрон музокараларнинг иккинчи босқичига ўтишга тайёр эди. Бу босқичда томонлар кенгроқ доирадаги мавзуларни, жумладан, Эрон ядро дастури билан боғлиқ масалаларни муҳокама қилишлари мумкин эди.

Эслатиб ўтамиз, аввалроқ АҚШ Президенти Дональд Трамп Америка Қўшма Штатлари ва Эрон ўртасида бир ойдан бери амал қилиб келаётган ўт очишни тўхтатиш келишуви “сунъий нафас бериш” ҳолатида эканини билдирганди. Кейинроқ, Эрон АҚШ билан музокараларнинг иккинчи босқичини бошлаш учун Вашингтон 5 та талабни бажариши шартлигини маълум қилди.