АҚШ Эронга қарши санкцияларни вақтинча бекор қилди

АҚШ Эрон билан ўтказилган дастлабки музокаралардан сўнг мамлакатга нисбатан қўлланган айрим санкцияларни 60 кун муддатга вақтинча бекор қилди. Бу ҳақда воситачи давлатлар – Покистон ва Қатар маълум қилган.

Аввалроқ, АҚШ вице-президенти Жей Ди Вэнс Швейцариядаги музокаралар якуни бўйича Эрон билан якуний тинчлик келишувига эришиш учун яхши асос яратилганини билдирганди. Бироқ Теҳрон ҳозирча ядровий дастур бўйича музокаралар бошланганини рад этмоқда.

Томонлар Қатарга тегишли Бюргеншток тоғ курортида ўтказилган учрашувда 60 кун ичида доимий келишувга эришиш бўйича йўл харитасини келишиб олган.
Шунингдек, Исроил ва “Ҳизбуллоҳ” ўртасидаги тўқнашувларни тўхтатиш механизми ҳам келишиб олинган. Ҳормуз бўғози орқали тижорий кемаларнинг хавфсиз ҳаракатланишини таъминлаш учун махсус алоқа канали ҳам ишга туширилган.

Келишувнинг иқтисодий қисми доирасида АҚШ Молия вазирлиги 21 августгача амал қиладиган имтиёз эълон қилган. Унга кўра, Эрон нефть ва нефть маҳсулотларини экспорт қилиши ҳамда улар учун тўловларни қабул қилиши мумкин бўлади.

Жей Ди Вэнснинг айтишича, Эрон халқаро ядровий инспекторларни қабул қилиш ва хорижда музлатилган активларни бошқариш бўйича механизмлар яратишга розилик билдирган. Бироқ Эрон Ташқи ишлар вазирлиги вакили Исмоил Бақоий мамлакат ҳали ядровий масалалар бўйича музокаралар олиб бормаганини ва янги мажбуриятлар олмаганини таъкидлаган.

Дональд Трамп эса Эрон ядровий фаолиятининг тинч мақсадларга хизмат қилаётганини тасдиқлаш учун қурол-яроғ текширувларига рози бўлишини билдирган.

Эрон Ташқи ишлар вазири Аббос Ароқчи Теҳрон нефть ва нефть-кимё маҳсулотлари экспорти учун имтиёзлар, музлатилган активларнинг бир қисмини қайтариш ҳамда мамлакатни тиклаш ва ривожлантириш дастурини ишга тушириш бўйича келишувларга эришганини маълум қилган.

Ливанда эса вазият нисбатан барқарорлашмоқда. Исроил март ойида “Ҳизбуллоҳ”нинг чегара орқали амалга оширган ҳужумларидан кейин жанубий Ливанга қўшин киритган эди. Жума куни янги ўт очишни тўхтатиш келишуви тузилган бўлса-да, яна бир кун давомида шиддатли жанглар кузатилганди.

Ливан расмийларининг маълум қилишича, 20 июнь кечасидан буён тўқнашувлар сезиларли даражада камайган. Бугун, 23 июнь куни Вашингтонда Исроил ва Ливан ўртасида янги музокаралар бошланиши кутилмоқда. Набатия шаҳридаги шифохона раҳбари Ҳасан Вазнийнинг таъкидлашича, бу уруш бошланганидан бери илк бор икки кун давомида нисбатан тўлиқ тинчлик сақланиши бўлган.