АҚШ ва Эрон 60 кун ичида якуний келишувга эришади

АҚШ ва Эрон Швейцарияда ўтказилган музокараларда 60 кун ичида якуний тинчлик келишувига эришиш бўйича йўл харитасини келишиб олди. Бу ҳақда Қатар Ташқи ишлар вазирлиги маълум қилди. 

Баёнотга кўра, Доха ва Исломобод воситачилигида тузилган қўмита юқори даражадаги “йўл харитаси”ни тасдиқлаган бўлиб, бу 60 кун ичида якуний келишувга олиб борувчи жараённинг асосини ташкил этади.

Шунингдек, бу келишув янги техник музокараларнинг дарҳол бошланишини назарда тутади.

Қатар ТИВнинг X саҳифасида эълон қилинган баёнотда айтилишича, АҚШ ва Эрон делегацияларининг биринчи раунди 22 июнь куни якунланган, бироқ техник музокаралар ҳафта охиригача давом этади. Улар Швейцариянинг Бургеншток курортида бўлиб ўтмоқда.

Томонлар, шунингдек, Ливанда ҳарбий ҳаракатларни тўхтатиш механизми бўйича келишган ва Ҳормуз бўғози орқали тижорат кемаларининг хавфсиз ўтиши учун алоқа линиясини очган.

“Reuters”нинг хабарига кўра, АҚШ вице-президенти Жей Ди Венс Эрон расмийлари билан музокараларни бошлаган ва апрель ойидан бери амал қилиб келаётган ўт очишни тўхтатиш режимини яна камида 60 кунга узайтириш масаласи муҳокама қилинган.

Аввалроқ, Эрон ТИВ вакили Исмоил Бағоий Ҳормуз бўғози орқали кемаларнинг хавфсиз ўтиши учун фавқулодда механизм яратилганини билдирган эди. Эрон Ташқи ишлар вазири Аббос Ароқчи эса нефть экспорти ва музлатилган активлар каби бир қатор масалалар бўйича келишувга эришилганини айтган.

Музокаралардан олдин Эрон Ҳормуз бўғозини қайта ёпиш ҳақида баёнот берган, АҚШ Президенти Дональд Трамп эса Эронга қайта ҳужумлар билан таҳдид қилган. Шундан сўнг, Эрон делегацияси музокара жойини тарк этгани ҳақида ҳам хабарлар тарқалган.

Эрон, шунингдек, Трампдан узр сўрашни талаб қилган, чунки у Эрон вакилларига Ҳормуз бўғози ёпилса “сизнинг давлaтингиз бўлмайди” деган мазмунда огоҳлантириш берган.

Келишув 18 июнь куни масофадан туриб имзоланган меморандумдан кейин бошланган бўлиб, у икки давлат ўртасидаги қуролли зиддиятни тугатиш ва кенгроқ тинчлик музокараларига йўл очишга қаратилган дастлабки қадам ҳисобланади.