АҚШ Эронга қарши денгиз блокадасини бекор қилди

АҚШ Эронга қарши жорий этилган денгиз блокадасини бекор қилди ва мамлакат портларига олиб борадиган барча денгиз йўлларини кемалар ҳаракати учун қайта очди. Бу ҳақда АҚШ Қуролли кучлари Марказий қўмондонлиги хабар берди.

Қўмондонликнинг маълум қилишича, қарор Президент Дональд Трамп топшириғига кўра қабул қилинган. Энди Америка ҳарбий кучлари Эрон портларига кираётган ёки улардан чиқаётган кемалар ҳаракатига тўсқинлик қилмайди.

“Бугун АҚШ кучлари Эрон портларига кирувчи ва чиқувчи барча денгиз ҳаракатига нисбатан блокадани бекор қилди. Кемаларнинг Эрон портларига бориши ёки улардан қайтишига ҳеч қандай чеклов қўйилмайди. Блокадани таъминлаш бўйича барча чоралар тўхтатилди”, дейилади баёнотда.

Шу билан бирга, АҚШ ҳарбий-денгиз кучлари минтақада қолади. Қўмондонликка кўра, ҳарбий кемалар эришилган келишув шартларига риоя этилишини назорат қилишда давом этади.

Аввалроқ, АҚШ ва Эрон ўртасида ўзаро англашув меморандуми электрон шаклда имзолангани хабар қилинган эди. Шу муносабат билан 19 июнь куни Женевада ўтказилиши режалаштирилган расмий имзолаш маросими бекор қилинган. Кейинроқ АҚШ томони Эрон билан эришилган меморандумнинг расмий матнини ҳам эълон қилган.

Эслатиб ўтамиз, олдинроқ CNN нашри АҚШ ва Эрон ўртасида тузилгани айтилган, “Исломобод меморандуми” деб номланган 14 банддан иборат ўзаро англашув меморандумининг тўлиқ матнини эълон қилганди.