АҚШ БМТ олдидаги 160 млн доллар қарзини тўлади

АҚШ БМТ олдидаги 4 миллиард доллардан ортиқ қарзининг тахминан 160 миллион долларини тўлаб берди. Бу ҳақда ташкилот матбуот котиби маълум қилди.

Баёнотга кўра, ўтган ҳафта Вашингтон ушбу халқаро тузлиманинг мунтазам бюджети бўйича аввалги тўловлардан қарздорликни қоплаш учун 160 миллион доллар ўтказган. Айни пайтда Қўшма Штатлар ҳали ҳам миллиардлаб доллар қарздор бўлиб қолмоқда.

Маълумотларга кўра, февраль ойи бошига келиб мунтазам бюджетдан қарз 2,19 миллиард долларни ташкил этган. Бундан ташқари, тинчликпарвар миссиялар учун 2,4 миллиард доллар ҳамда трибунал фаолияти учун 43,6 миллион доллар тўланмаган.

АҚШ Президенти Дональд Трамп Вашингтонда ўтган “Тинчлик кенгаши” ташаббусининг илк йиғилишида АҚШ БМТни молиявий жиҳатдан қўллаб-қувватлашини айтди. Унинг таъкидлашича, ташкилот “катта салоҳиятга эга”, бироқ бу имкониятдан тўлиқ фойдалана олмаяпти.

Вашингтон ташкилот бюджетининг энг йирик ҳиссадори ҳисобланади. Бироқ Трамп маъмурияти даврида мажбурий бадалларни тўлаш тўхтатилган, ихтиёрий молиялаштириш кескин қисқартирилган ҳамда АҚШ бир қатор БМТ агентликларидан чиқиб кетган.

“Тинчлик кенгаши” ташаббуси эса халқаро майдонда турлича баҳоланмоқда. Айрим давлатлар ва экспертлар мазкур тузилма БМТ ваколатларига соя солиши мумкинлигини билдирган. Кенгаш дастлаб Ғазо секторидаги вақтинчалик бошқарувни назорат қилиш учун таклиф этилган бўлсада, кейинчалик унинг ваколатини глобал можароларга кенгайтириш режалари ҳам тилга олинган.

Баъзи экспертлари Трамп бошчилигидаги кенгаш моделида Фаластин вакили йўқлигига эътибор қаратган. Шунингдек, мазкур йиғилишда БМТ вакиллари иштирок этмаган.

Эслатиб ўтамиз, аввалроқ Беларусь фуқароси Александр Лукашенко Бирлашган Миллатлар Ташкилотини кераксиз ташкилот деб атаган эди.