Африкада янги можаро бошланмоқда (видео)

М23 ҳаракатининг Руанда томонидан қўллаб-қувватланаётган Конго исёнчилари Конго Демократик Республикаси шарқидаги йирик Гома шаҳрини эгаллаб олганини эълон қилди. Бу ҳақда “Reuters” хабар берди.

Маълум қилинишича, 26 январь куни Руанда армияси томонидан қўллаб-қувватланган М23 гуруҳининг исёнчилари Гома чеккаларига бостириб кириб, оммавий ваҳима ва аҳолининг қочиб кетишига сабаб бўлган. 

Бугун, 27 январь куни исёнчилар Конгонинг марказий қисмига кирган. “Reuters” агентлигига кўра, улар бутун шаҳар устидан назоратни сақлаб қолгани ҳалигача аниқ эмас. Маҳаллий аҳоли ва расмийларга кўра, Конго ҳукумат армияси ва БМТ тинчликпарвар кучлари ҳамон аэропортда қочиб кетиш ниятида қолмоқда.

“Шаҳарда тартибсизлик ҳукм сурмоқда. Аэропорт яқинида аскарларни кўряпмиз, лекин мен М23 ни ҳали кўрмадим. Дўконларни талон-торож қилиш ҳолатлари ҳам бор”,  деган гувоҳлардан бири.

Айтилишича, Гома марказида ва Руанда билан чегарага яқинроқ жойда тартибсиз отишма овози эшитилган.

Қайд этилишича, олдинроқ исёнчилар Гоманинг асосий таъминот йўлларидан биридаги муҳим шаҳар Минова ва Конго ДР армиясининг асосий мудофаа позицияси бўлган Сакени назорати остига олган. 24 январь куни улар Шимолий Киву ҳарбий губернаторини отиб ўлдирган ва 25 январь куни Гомадаги ҳукумат қўшинларига таслим бўлиши учун 48 соат вақт берган.

Кеча, 26 январь куни бўлиб ўтган Хавфсизлик кенгашида БМТ тинчликпарвар миссияси раҳбари Бинту Кейта жангарилар тирик қалқон сифатида фойдаланилаётган тинч аҳолининг доимий кўчирилиши тезлашганини айтган.

“Йўллар тўсилган, М23 ҳаво бўшлиғини ёпиқ деб эълон қилди, биз тузоққа тушдик”, деган у.

Руанданинг БМТдаги элчиси, агар Конго ДР ҳукумати “тинчлик тарафдори эканлигини” кўрсатганида, ҳозирги кескинлашувнинг олдини олиш мумкинлигини айтган.