Аэропортдаги ходимага пичоқ ўқталган эркак 11 йилга қамалди

Қозоғистоннинг Олмаота шаҳридаги Туркисиб туман суди шаҳар аэропортида гаровга олиш ҳолатига алоқадор жиноят бўйича 67 ёшли Машраббек Баратовни 11 йил йилга озодликдан маҳрум қилди. Бу ҳақда “Stan.kz” хабар берди.

Судланувчи Қозоғистон Республикаси Жиноят кодексининг гаровга олиш, қурол ишлатган ҳолда безорилик қилиш, террорчилик ҳаракати ҳақида ёлғон хабар бериш моддалари бўйича айбдор деб топилган. 

Суд, шунингдек, 2023 йилда унга нисбатан тайинланган, аммо ҳали тўлиқ ижро этилмаган жазони – озодликни чеклаш чорасини янги жазо муддатига қўшишга қарор қилган. Шу тариқа, якуний жазо муддати 11 йил озодликдан маҳрум этиш бўлган.

Баратов жазо муддатини ўртача даражали хавфсизликдаги жазони ижро этиш муассасасида ўтайди. Енгиллаштирувчи ҳолат сифатида, у суд жараёнида ўз айбини тан олгани эътиборга олинган (у судда аэропортга тасодифан тушиб қолганини айтган).

Эслатиб ўтамиз, жорий йилнинг 7 март куни Баратов ички рейслар терминалида ўзини йўловчи сифатида кўрсатиб, парвоздан олдинги текширув ҳудудига кирганди. Авиация хавфсизлик хизмати ходимлари ундан ҳужжатларини кўрсатишни сўрашгач, у текширув ходимасини сочидан тортиб ушлаб, унга пичоқ билан таҳдид қилганди. У шунингдек, ўзида бомба борлиги ва уни портлатмоқчи эканини айтган.

Баратовни Муса Сайранбайули Абдурайим исмли йўловчи зарарсизлантирган. У Баратов билан суҳбатлашиб, ўзини аёл ўрнига гаровга олишни таклиф қилган, бир муддат эътиборини чалғитган, сўнг эса кескин ҳаракат билан пичоқни тортиб олган.

Ўша куни, Қозоғистон Президенти Қосим-Жомарт Тўқаев фармони билан бу эркак “Мардлиги учун” медали билан тақдирланган.