Абитуриентлар учун тест синовлари бошланиш санаси эълон қилинди
Жамият
−
15:26 2074 1 дақиқа
2026–2027 ўқув йили учун олий таълим муассасаларига кириш тест синовлари 14–23 июль кунлари бўлиб ўтади. Бу ҳақда Билим ва малакаларни баҳолаш агентлиги хабар берди.
Қайд этилишича, тест синовлари 10 кун давомида кунига икки сменада ташкил этилади. Биринчи смена соат 08:00 да, иккинчи смена эса 15:00 да бошланади.
Абитуриентлардан тест ўтказиладиган ҳудудга белгиланган вақтдан камида 1,5 соат олдин етиб келиш сўралган.
Шунингдек, “Абитуриент рухсатномаси”ни my.uzbmb.uz сайти орқали юклаб олиб, чоп этиб олиш кераклиги қайд этилган.
Маълум қилинишича, тест синовига киришда абитуриент ўзи билан паспорт ёки ID-карта ҳамда рухсатномани олиб келиши шарт ҳисобланади. Паспорт нусхаси билан келган ёки белгиланган вақтдан кечиккан абитуриентлар тест синовига киритилмайди.
Эслатиб ўтамиз, аввалроқ 2026–2027 ўқув йили учун Ўзбекистон олий таълим муассасаларига кириш истагини билдирган 677 минг 907 нафар абитуриент онлайн рўйхатдан ўтгани ва бу сўнгги етти йилдаги энг паст кўрсаткич сифатида қайд этилгани ҳақида хабар берилган эди. Шунингдек, барча фанлардан миллий ёки халқаро сертификатга эга бўлган 12 минг 997 нафар абитуриент тест синовларидан озод қилиниб, бевосита олий таълим муассасаларига қабул танловининг кейинги босқичига ўтказилган эди.
