Абдусатторов Жаҳон чемпионатида учинчи ўринни эгаллади

Кеча, 15 февраль куни Германиянинг Вайзенхаус шаҳрида фристайл бўйича Жаҳон чемпионати ўз якунига етди. Унда ўзбекистонлик гроссмейстер Нодирбек Абдусатторов учинчи ўринни эгаллади.

Биринчи бор ўтказилган ушбу мусобақада норвегиялик шахматчи Магнус Карлсен бош совринни қўлга киритди. Нодирбек Абдусатторов учинчи ўринни эгаллаган бўлса, Жавоҳир Синдоров эса саккизинчи поғона билан турнирни якунлади.

Абдусатторов учинчи ўрин учун баҳсда Винсент Кеймерни 2.5-1.5 ҳисобида мағлуб этди ва 40 000 АҚШ доллари миқдорида мукофотни қўлга киритди. 

Қайд этиш жоизки, Нодирбек 3-ўрин орқали 2027 йилги фристайл бўйича  Жаҳон чемпионатида иштирок этиш учун йўлланмани ҳам ўзиники қилиб олди.

Жавоҳир Синдоров эса турнирни 8-ўринда якунлаган ҳолда 10 000 АҚШ доллари мукофотни қўлга киритди.

Эслатиб ўтамиз, жорий йилнинг 1 февраль куни Нодирбек Абдусатторов Нидерландиянинг Вейк-ан-Зее шаҳрида бўлиб ўтган шахмат бўйича анъанавий Tata Steel Chess мусобақаси бош совринини қўлга киритганди.