Аббосбек Файзуллаев “Башакшеҳир”нинг энг қиммат футболчиси бўлди

Аввалроқ, ўзбекистонлик футболчи Аббосбек Файзуллаев Туркиянинг Истанбул шаҳри шарафини ҳимоя қилувчи “Башакшеҳир” клубига кўчиб ўтгани хабар қилинган эди. Ушбу трансфер орқали у янги жамоасида энг қиммат футболчига айланди. Бу ҳақда “Tranfermarkt” портали маълумотларида келтирилган.

Портал 21 ёшли ўзбекистонлик ҳужумкор ярим ҳимоячини 8 млн еврога баҳоламоқда. Ундан кейин эса яқинда Италиянинг “Рома” клубидан “Башакшеҳир”га кўчиб келган бошқа бир ўзбекистонлик футболчи Элдор Шомуродов ўрин олган. “Tranfermarkt” Шомуродовнинг трансфер баҳосини 5 млн евро этиб белгилаган. Кучли учликда Гана ва Англия фуқаролигига эга 26 ёшли ҳимоячи Жероме Опоку турибди. Портал унинг ҳам трансфер нархини 5 млн евро қилиб қайд этган.

Маълумот учун, “Башакшеҳир” клубининг умумий баҳоси 63 млн еврони ташкил қилмоқда. Жамоада 6 нафар миллий терма жамоа футболчиси бор. Легионерлар эса 14 нафарни ташкил қилади. Жамоанинг ўртача ёши – 25,4. Ўтган мавсумда клуб миллий чемпионатда 5-ўринни эгаллаган.