Аббос Файзуллаев қайси клубга ўтади?

Ўзбекистон миллий терма жамоаси ва ЦСКА клуби иқтидорли футболчиси Аббосбек Файзуллаевнинг кейинги фаолияти бўйича бир қанча тахминлар янграмоқда. QALAMPIR.UZ Самвел Карленович Telegram канали билан бирга ўзбекистонлик футболчи атрофидаги вазиятни ўрганиб чиқди.

Аввало, Файзуллаевнинг агенти Герман Ткаченко футболчининг “Бенфика”га ўтмаганлиги сабаби сифатида Португалия Россия билан ишламаслигини айтган. 

Хўш, унда ЦСКА Европага кимнидир пулга сотиши мумкинми? 

 “Бу жуда қийин, муаммолар борлиги муқаррар. Лекин битим қилиш мумкин. Аббос бир муддат Европа олдидан “кўприк-лигада” ўйнаши ҳам мумкинлигини истисно этмаймиз”, дейди Ткаченко.

Файзуллаев бўйича “Бавария” каби клублар билан алоқалар сақланганми? 

“Қизиқишлар жуда кўп. Лекин бу музокаралар дегани эмас. Клубларнинг номини айтмайман, буни биласиз. Аммо лигалар? Фақат топ даражадаги лигалардан таклиф бор. Аббос арзон ўйинчи эмас ва унинг даражаси кейинги қадамга жиддий ёндашувни талаб қилади”, дейди агент.

Бу гапларга кўра, агент ва ЦСКА Аббосни қимматга сотиб, яхши пул  қилишни мақсад қилган. Ҳатто бунга эришиш учун сиёсий низоларни айланиб ўтиш йўлларини ўйлаб топиш талаб этилса ҳам. 

Қайси давлат “кўприк” бўлиши мумкин?

Европа футболига қадам босишда айни вақтга келиб, Туркия чемпионати қулай вариантлардан бири. Чунки ушбу чемпионат вакиллари Европанинг энг нуфузли мусобақаларида иштирок этади. Файзуллаев атрофидаги вазиятни кузатиб бораётган “Галатасарой” клуби Чемпионлар лигасида, Европа лигасида ҳар мавсум иштирок этади. Скаутлар ҳам айнан бирор бир мамлакатнинг катта клуби футболчиларини излайди. “Галатасарой”дан Европанинг бошқа номдорроқ клубига ўтиш нисбатан осонроқ. Окан Бурук қўл остидаги жамоа Туркия Суперлигасида 74 очко жамғарган ҳолда етакчилик қилмоқда. Бу дегани агар мавсум якунига қадар етакчиликни қўлдан бой бермаса, кейинги мавсумда Чемпионлар лигасида иштирок этади. 

“Бенфика” варианти ҳам ёмон эмас. Чунки Лиссабон клуби ҳам худди “Галатасарой”га ўхшаб, ўз миллий чемпионатида ҳар йили совринли ўринларни эгаллайди ва кейинги мавсумдан Еврокубокларда иштирок этади.  “Бенфика” ҳам Файзуллаевнинг ўсиши учун трамплин вазифасин бажара олади.

“Монако” ҳам Франция чемпионатида ҳар йили совринли ўринлар учун курашади. Ҳар мавсум Еврокубокларни канда қилмайдиган клуб ҳам Файзуллаевга трамплин вазифасини бажаришга қодир. Ҳар ҳолда Абдуқодир Ҳусанов “Ланс”даги ўйинлари билан “Манчестер Сити” назарига тушган.

“Бавария” варианти жуда мукаммалдек кўринади. Аммо реал кўз билан қаралса, Мюнхен клубида Файзуллаев ўзини қай даражада кўрсата олиши ҳам аҳамиятли. Сабаби “Бавария”нинг айни вақтдаги таркибида дунё футболида ўзининг обрў-эътиборига эга футболчилар ўйнайди. Айнан ўзбекистонлик футболчининг позицияси ҳисобланган чап қанот вингер зонасида Лерой Сане, Кингсли Коман, Серж Гнабри кабилар ўйнайди. Ўнг қанотда эса Майкл Олисе бор. Яъни “Бавария”да Файзуллаев ўйин амалиётига эга бўлмаслиги эҳтимоли юқори. Аммо бу футболчи ўзини катта клублар сафида синаб кўрмасин дегани эмас.

Шунингдек, Ўзбекистон миллий терма жамоаси собиқ футболчиси Акмал Шораҳмедов QALAMPIR.UZ'га берган интервьюсида Аббос Файзуллаевнинг келажаги борасида ўз фикрларини билдириб ўтган эди.

“Ўтган куни Германияда ишлаётган дўстим “Бавария” мутахассислари билан бир даврада Файзуллаевнинг трансферини кўриб чиқаётгани ҳақида муҳокама қилганини айтиб қолди. Германияда Ҳусановдан кўра Файзуллаевни кўпроқ кузатишмоқда. Чунки у ҳужумкор, тезкор футболчи. Менимча, ЦСКА Файзуллаевнинг нархи ошиши билан тезда сотади. Сентябрь ойида Аббосбек Бундеслигада фаолиятини давом эттиришига ишонаман”, дейди Шораҳмедов.

Умид қиламизки, ЦСКА ва Файзуллаевнинг агентлари футболчи учун фойдали қарорни қабул қилади.