8 та голли ўйинда “Манчестер Юнайтед” ғалабани қўлдан бой берди

Кеча, 15 декабрь куни Англия Премьер-лигасининг 16-тури доирасида “Манчестер Юнайтед” ва “Борнмут” жамоалари ўртасида учрашув бўлиб ўтди. “Олд Траффорд” стадионида кечган баҳс 4:4 ҳисобидаги жанговар дуранг билан якунланди.

Учрашувда дастлаб 13-дақиқада Амад Диалло мезбонларни ҳисобда олдинга олиб чиқди. 40-дақиқада эса Антуан Семеньо ҳисобдаги мувозанатни тиклади. Биринчи бўлимга қўшиб берилган дақиқаларда Бруну Фернандешнинг узатмасидан сўнг Каземиро гол уриб, “Манчестер Юнайтед”ни танаффусга ҳисобда олдинда олиб чиқди.

Иккинчи бўлим бошида, 46-дақиқада Эванилсон ҳисобни яна тенглаштирди. Орадан кўп ўтмай, 52-дақиқада Таверньер  “Борнмут”ни ҳисобда олдинга олиб чиқди. Кейинчалик 72-дақиқада Бруну Фернандеш ва 79-дақиқада Матеус Куньянинг голлари эвазига манчестерликлар яна ўйиндаги устунликни ўз қўлига олди. Бироқ 84-дақиқада Эли Жуниор Крупи яна бир бор мувозанатни тиклади. Якунда учрашув 4:4 ҳисобидаги жанговар дуранг билан якунига етди.

Шу тариқа, “Манчестер Юнайтед” Премьер-лиганинг 16-туридан сўнг очколари сонини 16 тага етказиб, турнир жадвалида 6-ўринни эгаллаб турибди. “Борнмут” эса 21 очко билан 13-поғонада жойлашган.

Навбатдаги турда “Манчестер Юнайтед” сафарда “Астон Вилла” меҳмони бўлади. “Борнмут” эса ўз майдонида “Бёрнли” жамоасини қабул қилади.