61 мингдан ортиқ мухлис ЖЧ финалини қайта ўтказишни талаб қилмоқда

2026 йилги Жаҳон чемпионати финалида Испанияга мағлуб бўлган Аргентина терма жамоаси мухлислари FIFA’дан ҳал қилувчи учрашувни қайта ўтказишни талаб қилмоқда. Ҳозирда 61 мингдан ортиқ мухлис ушбу талаб бўйича петиция имзолади.

Жорий йилнинг 19 июль куни Нью-Йоркда бўлиб ўтган финалда Испания қўшимча вақтда Аргентинани 1:0 ҳисобида мағлуб этиб, Жаҳон чемпионига айланган эди. Бироқ учрашувдан кейин аргентиналик мухлислар ҳакам Славко Винчичнинг бир қатор қарорларидан норози бўлиб, интернетда кенг кўламли норозилик кампаниясини бошлади.

Финал якунланганидан кўп ўтмай Change.org платформасида FIFA’дан финал учрашувини қайта ўтказишни талаб қилувчи онлайн петиция эълон қилинди.

Ҳозирга қадар ушбу мурожаатни 61 500 нафардан ортиқ киши имзолаган бўлиб, имзолар сони ортишда давом этмоқда.

Петиция муаллифи Гисела Санчеснинг таъкидлашича, словениялик ҳакам Славко Винчичнинг бир қатор қарорлари ўйин тақдирига таъсир кўрсатган. Унинг фикрича, айрим вазиятларда чиқарилган қарорлар Аргентина манфаатларига зид бўлган ва финал натижасига таъсир ўтказган.

Эътиборлиси, 2026 йилги Жаҳон чемпионати давомида бундай кампаниялар илк бор кузатилаётгани йўқ. Аввалроқ Франция ва Испания ўртасидаги ярим финалдан кейин ҳам 82 мингдан ортиқ француз мухлиси баҳсли пенальти қарори сабабли учрашувни қайта ўтказишни талаб қилиб петицияга имзо чеккан эди. Бироқ ўша ҳолатда ҳам FIFA расмий натижани ўзгартирмаган ва мусобақа натижалари ўз кучида қолган.

Эслатиб ўтамиз, аввалроқ 3 миллиондан ортиқ мухлис Аргентина миллий терма жамоасини 2026 йилги Жаҳон чемпионатидан четлатиш талаб қилинган петиция имзолаганди.