2026 йил тарихдаги иккинчи энг иссиқ йил бўлиши мумкин

2026 йил метеокузатувлар тарихидаги иккинчи энг иссиқ йилга айланиши мумкин. Бундай прогнозни Европанинг “Copernicus” иқлим ўзгаришларини кузатиш хизмати эълон қилди.

Мутахассисларнинг баҳолашича, 2026 йил ўртача глобал ҳарорат бўйича иккинчи ўринни эгаллаш эҳтимоли тахминан 80 фоизни ташкил этади. Шу билан бирга, у 2024 йилги ҳарорат рекордини такрорлаши ёки ундан ўзиб кетиши бўйича 20 фоизлик эҳтимол сақланиб қолмоқда.

Прогнозга кўра, бутун 2026 йил учун ўртача глобал ҳарорат 1850–1900 йиллардаги саноатгача бўлган даражадан 1,56–1,61 даража Цельсийга юқори бўлади. 1,5 даражали кўрсаткичдан ортиб кетиш эҳтимоли 99 фоиздан кўпроққа баҳоланмоқда.

Агар прогноз ўз тасдиғини топса, 2026 йил ўртача глобал ҳарорат саноатгача бўлган даражадан 1,5 даражага ошадиган 2024 йилдан кейинги иккинчи календарь йил бўлади.

Бундан ташқари, мутахассислар 2023 йилдан 2026 йилгача бўлган тўрт йиллик даврдаги ўртача глобал ҳарорат ҳам кўрсатилган кўрсаткичдан ортиб кетишини прогноз қилмоқда.

Маълумот учун, иқлим бўйича Париж битими узоқ муддатли глобал исишни 1,5 даражагача чеклаш бўйича саъй-ҳаракатларни назарда тутади. Шу билан бирга, алоҳида олинган календарь йилда ушбу чегарадан ортиб кетиш ҳали битимнинг узоқ муддатли мақсади узил-кесил бузилганини англатмайди.

Эслатиб ўтамиз, аввалроқ Ернинг исиши сайёрадаги иккита йирик муз қопламининг эришини тезлаштираётгани ҳақида хабар берилган эди. Хусусан, Гренландия ва Антарктидада 1979 йилдан буён 12,5 триллион тонна муз эриб кетган.