17 ёшли Ямаль Миллатлар лигаси тарихига кирди

Испания ва Нидерландия терма жамоалари ўзаро тўқнаш келган UEFA Миллатлар лигаси 1/4 финалининг жавоб учрашувида мезбонлар вингери Ламин Ямаль гол уриб, турнирнинг тарихий рекордини ўрнатди.

Ламин турнирда гол урган энг ёш футболчига айланди. Учрашув вақтида испаниялик футболчи 17 ёшу 258 кунлик эди. Олдинги рекорд Ямалнинг ҳамюрти ва “Барселона”даги жамоадоши Гавига тегишли эди. У 17 ёшу 304 кунлигида мусобақада гол урган.

Маълумот учун мезбонлар пенальтилар сериясида (3:3, 5:4 пен.) ғалаба қозониб, турнирнинг ярим финалига йўл олди. Испания терма жамоаси UEFA Миллатлар лигасининг амалдаги ғолиби ҳисобланади. Сўнгги турнир финалида улар Хорватияни мағлуб этди (0:0, 5:4 пен). Турнир ярим финалида “қизил фурия” Франция терма жамоаси билан тўқнаш келади. Иккинчи ярим финалда Португалия ва Германия терма жамоалари ўзаро ҳисоб-китоб қилиб олади. Баҳслар июнь ойига белгиланган.

Эслатиб ўтамиз, аввалроқ Португалия терма жамоаси футболчиси Криштиану Роналду ҳам Миллатлар лигасидаги ўйини орқали янги рекорд ўрнатгани хабар қилинганди.