1 ҳафтада қарийб 20 млрд сўмлик ток ва газни ўғирлаганлар ушланди

1-7 апрель кунлари Ўзбекистон миқёсида 19,5 млрд сўмлик энергия ресурсларидан ноқонуний фойдаланиш ҳолатларига чек қўйилди. Бу ҳақда Давлат хавфсизлик хизмати хабар берди.

Қайд этилишича, жорий йилнинг 1-7 апрель кунлари ДХХ, ИИВ, Бош прокуратура ва Ўзэнергоинспекция ходимлари ҳамкорлигида республика бўйлаб ўтказилган рейд тадбирларида жами 2776 та ҳолатлар аниқланиб, шундан электр энергиясидан 1807 та, табиий газдан 969 та ҳолатда жами 19,5 млрд сўмлик зарар етказилганлик ҳолатлари бўйича далолатномалар тузилган. 

Шунингдек, олиб борилган чора-тадбирлар натижасида 6,8 млрд сўм давлат фойдасига ундирилган. Республика бўйича аниқланган ноқонуний ҳолатлар юзасидан ҳуқуқни муҳофаза қилувчи идоралар томонидан ушбу даврда 39 та жиноят иши қўзғатилиб, 263 та маъмурий жазо чоралари қўлланилган. Мазкур йўналишда рейд тадбирлари давом эттирилмоқда. 

Эслатиб ўтамиз, аввалроқ Наманган ва Самарқанд вилоятларида 2,1 миллиард сўмлик табиий газдан ноқонуний фойдаланган новвойхона ва иссиқхона аниқланган эди.