ҲАМАС Рамазон ҳайити муносабати билан гаровдаги исроилликларни озод қилиши мумкин

Фаластиннинг ҲАМАС ҳаракати Рамазон ҳайити муносабати билан Ғазо секторида ўт очишни тўхтатиш учун бир нечта гаровга олинганларни озод қилиши мумкин. Бу ҳақда Исроилнинг KAN телеканали хабар берди.

Телеканалнинг маълум қилишича, ҲАМАС ҳаракати Рамазон ҳайити байрами пайтида ўт очишни тўхтатиш эвазига бир қанча гаровга олинганларни, жумладан, Америка фуқаролигига эга бўлган исроиллик аскар Идан Александрни озод қилишга тайёр. Бунинг эвазига гуруҳ Исроилдан Рамазон ҳайитини нишонлаш вақтида вақтинчалик сулҳ тузишни талаб қилмоқда.

Қайд этилишича, бир неча кунлик ўт очишни тўхтатиш гуруҳга шу ҳафта Ғазо секторида ҲАМАС бошқарувига қарши уюштирилган норозилик намойишларини бостириш учун зарур.

Маълумот учун, Исроил армияси 19 январдан кучга кирган ўт очишни тўхтатиш келишуви тугаганидан сўнг, 18 март куни эрталаб блокададаги Ғазо секторига интенсив ҳужумларни давом эттирди. 2023 йилнинг 7 октябрь куни Исроилнинг Ғазо секторига ҳужумлари бошланганидан бери ҳалок бўлган фаластинликлар сони 50 мингдан ошди, ярадорлар сони эса 113 минг 274 нафарга етди.

Эслатиб ўтамиз, аввалроқ Исроил Мудофаа вазири Исроил Кац ўзининг Х ижтимоий тармоғида Исроил ҲАМАС томонидан гаровга олинганларнинг барчасини озод қилишга эришмагунча, Ғазодаги операцияни давом эттириши ҳақида ёзганди.