ҲАМАС ҳафта охиригача гаровдагиларни озод қилади

ҲАМАС ва бошқа Фаластин гуруҳлари томонидан 33 нафар гаровга олинганлар жорий йилнинг 19 январь кунига қадар Исроил ва ҲАМАС келишувининг биринчи босқичида озод этилади. Бу ҳақда “The Times of Israel” хабар берди.

Маълум қилинишича, ушбу амалиёт доирасида киббутзим ва “Нова” мусиқа фестивалидан ўғирлаб кетилган беш нафар аёл, икки бола, ЦАХАЛда хизмат қилган беш нафар шахс, 50 ёшдан ошган 10 нафар эркак ва 50 ёшгача бўлган 11 нафар эркак қайтарилади.  Озод қилинганлар орасида Кибуц Нир-Оз шаҳрига ҳужум пайтида оиласи билан бирга Фаластин гуруҳлари  томонидан асирга олинган Россия ва Исроил фуқароси Александр Труфанов ҳам бўлиши мумкин. Унинг отаси ўлдирилган. Труфановнинг онаси ва бувиси 2023 йилнинг ноябрида озодликка чиқарилган.

Маълумот учун, ўт очишни тўхтатиш келишуви уч босқичдан иборат. Улардан биринчиси олти ҳафта давом этиши кутилмоқда. ҲАМАС 33 нафар исроиллик гаровга олинганларни, жумладан, барча аёллар, болалар ва 50 ёшдан ошган эркакларни озод қилади. ОАВ маълумотларига кўра, Ғазода 98 нафар маҳбус сақланмоқда. Бунинг эвазига Исроил қамоқхоналарида сақланаётган фаластинликлар озод қилиниши керак. (гаровдаги бир исроиллик учун 30 нафар, бир яхудий аскари учун 50 нафар фаластинлик)

Эслатиб ўтамиз, Исроил, Фаластиннинг ҲАМАС ҳаракати, АҚШ ва Қатар вакиллари 16 январь куни кечқурун Доҳада Ғазо секторида гаровга олинганларни озод қилиш ва ўт очишни тўхтатиш бўйича келишувни расман имзолаганди.  Келишув бўйича АҚШнинг сайланган президенти Дональд Трампнинг Яқин Шарқ бўйича махсус вакили Стивен Виткофф, Оқ уй Миллий хавфсизлик кенгашининг Яқин Шарқ ва Шимолий Африка бўйича координатори Бретт Макгурк ҳамда Қатар ва Миср воситачилари музокаралар олиб боришган. АҚШ томонидаги келишув Бретт Макгурк томонидан имзоланган. “The Washington Post” нашрининг ёзишича, Исроил Бош вазири Биньямин Нетаньяху ўнг қанот коалициясидаги ҳамкорларига ҲАМАС билан сулҳнинг биринчи босқичидан сўнг Ғазо секторида ҳарбий операцияни қайта бошлашга ваъда берган.