Испанияда автобус 20 метр жарликка қулаб кетди

Испаниянинг Барселона шаҳри яқинида автобуснинг жарликка қулаши оқибатида 83 киши жароҳатланди. Бу ҳақда “Associated Press” хабар берди.

Қайд этилишича, ҳодиса жорий йилнинг 25 октябрь куни Барселона яқинидаги Фогарс-де-Монклюс ҳудудида содир бўлган. Маълумотларга кўра, автобус тор ва бурилишлари кўп йўлдан чиқиб кетиб, тахминан 20 метр чуқурликдаги жарликка қулаган.

Жароҳатланганларнинг етти нафари оғир, 18 нафари ўртача даражада, 58 нафари эса енгил тан жароҳатлари олган. Воқеа жойига 23 та тез ёрдам машинаси ва иккита тиббий вертолёт юборилган. Шунингдек, қутқарувчилар ва тиббиёт ходимларининг қўшма гуруҳлари ҳамда психологик ёрдам гуруҳлари жалб этилган.

Каталония ҳукумати соғлиқни сақлаш вазири Олга Пане қутқарувчилар ҳодиса жойи ва унинг атрофини текшириб, бошқа жабрланганлар бор-йўқлигини аниқлаётганини билдирган. Қидирув ишларига тоғ-қутқарув бўлинмалари ҳам жалб қилинган.

Ҳозирча автобуснинг йўлдан чиқиб кетиши сабаблари маълум эмас. Ҳодиса юзасидан текширув олиб борилмоқда.

Эслатиб ўтамиз, аввалроқ Мисрда сайёҳлик автобуси юк машинаси билан тўқнашиши оқибатида 13 киши ҳалок бўлгани, яна 34 киши жароҳатлангани ҳақида хабар берилган эди.