Зеленский Польшадан олган орденини почта орқали қайтариб юборди

Украина Президенти Владимир Зеленский “Оқ бургут” орденини почта орқали Польша Президенти Кароль Навроцкийга қайтариб юборганини маълум қилди.

Зеленский ўзининг Telegram-каналида ёзишича, Польша томони мазкур орденни мамлакатнинг энг юксак ишончи ва миннатдорлиги рамзи сифатида таърифлаган.

“Польша Президентининг таъкидлашича, “Оқ бургут” ордени оддий мукофот эмас. У Польша давлати билан алоҳида боғлиқлик ва халқнинг махсус миннатдорлигини англатади”, деган Зеленский.

Украина раҳбари, шу билан бирга, агар ушбу мукофот ҳали ҳам Россия императрицаси Екатерина II, Италия диктатори Бенито Муссолини ва Германиянинг собиқ канцлери Герхард Шрёдер каби баҳсли шахслар номида сақланаётган бўлса, Киев бу масала юзасидан баҳслашмаслигини билдирган.

Зеленский Украина Польша халқига Россияга қарши уруш давомида кўрсатилган ёрдам ва ҳамкорлик учун миннатдорлигини таъкидлаган. У икки давлат ўртасидаги ҳамкорлик нафақат Украина, балки бутун минтақа хавфсизлиги учун муҳим аҳамиятга эга эканини қайд этган.

Шунингдек, Украина раҳбари мамлакати Россия бошлаган урушда ўзини ҳимоя қилишда давом этиши ва муносиб тинчликка эришишига ишонч билдирган.

Баёнот якунида Зеленский 2023 йилда мазкур орден аслида Украина халқи ва мамлакат армиясига бағишланган деб ҳисоблаганини айтган.

“Бугун мен ушбу орденни Польша Президентига қайтариб юбордим. Келажак украиналикларга бўлган ҳурматни тасдиқлайди”, деган у.

Маълумот учун, Владимир Зеленский “Оқ бургут” ордени билан 2023 йил апрель ойида тақдирланган. Ўша вақтда Польша Президенти Анджей Дуда мазкур мукофот Польша олдида алоҳида хизмат кўрсатган шахсларга берилишини таъкидлаган эди.