Zelenskiy Polshadan olgan ordenini pochta orqali qaytarib yubordi

Ukraina Prezidenti Vladimir Zelenskiy “Oq burgut” ordenini pochta orqali Polsha Prezidenti Karol Navrotskiyga qaytarib yuborganini ma’lum qildi.

Zelenskiy o‘zining Telegram-kanalida yozishicha, Polsha tomoni mazkur ordenni mamlakatning eng yuksak ishonchi va minnatdorligi ramzi sifatida ta’riflagan.

“Polsha Prezidentining ta’kidlashicha, “Oq burgut” ordeni oddiy mukofot emas. U Polsha davlati bilan alohida bog‘liqlik va xalqning maxsus minnatdorligini anglatadi”, degan Zelenskiy.

Ukraina rahbari, shu bilan birga, agar ushbu mukofot hali ham Rossiya imperatritsasi Yekaterina II, Italiya diktatori Benito Mussolini va Germaniyaning sobiq kansleri Gerxard Shryoder kabi bahsli shaxslar nomida saqlanayotgan bo‘lsa, Kiyev bu masala yuzasidan bahslashmasligini bildirgan.

Zelenskiy Ukraina Polsha xalqiga Rossiyaga qarshi urush davomida ko‘rsatilgan yordam va hamkorlik uchun minnatdorligini ta’kidlagan. U ikki davlat o‘rtasidagi hamkorlik nafaqat Ukraina, balki butun mintaqa xavfsizligi uchun muhim ahamiyatga ega ekanini qayd etgan.

Shuningdek, Ukraina rahbari mamlakati Rossiya boshlagan urushda o‘zini himoya qilishda davom etishi va munosib tinchlikka erishishiga ishonch bildirgan.

Bayonot yakunida Zelenskiy 2023 yilda mazkur orden aslida Ukraina xalqi va mamlakat armiyasiga bag‘ishlangan deb hisoblaganini aytgan.

“Bugun men ushbu ordenni Polsha Prezidentiga qaytarib yubordim. Kelajak ukrainaliklarga bo‘lgan hurmatni tasdiqlaydi”, degan u.

Ma’lumot uchun, Vladimir Zelenskiy “Oq burgut” ordeni bilan 2023 yil aprel oyida taqdirlangan. O‘sha vaqtda Polsha Prezidenti Andjey Duda mazkur mukofot Polsha oldida alohida xizmat ko‘rsatgan shaxslarga berilishini ta’kidlagan edi.