Ўзбекистон инвестициявий салоҳиятини изчил ошириб бормоқда – Саида Мирзиёева

Ўзбекистон ўзининг инвестициявий салоҳиятини изчил ошириб бормоқда. Бу ҳақда Ўзбекистон Президенти Администрацияси раҳбари Саида Мирзиёева ўзининг Telegram-каналида ёзди.

Унинг билдиришича, бу йилги Тошкент инвестиция форуми дунёнинг 100 та мамлакатидан 4000 дан зиёд иштирокчини ўзида жамлаган. Анжуман дастури ғоят сермазмун бўлиб, ундан долзарб глобал иқтисодий масалалар муҳокамаси, турли давлатлар ҳукуматлари ҳамда халқаро ташкилотлар вакиллари, инвесторлар ва экспертлар билан учрашувлар ўрин олган.

“Форум доирасида Президентимиз мамлакатимиз иқтисодиёти ўсишини таъминлайдиган олтита устувор йўналишни белгилаб бердилар. Булар қаторида капитал бозорини ривожлантириш, "яшил" иқтисодиёт, сунъий интеллект технологияларини жорий этиш ҳамда инвесторларнинг ҳуқуқий ҳимоясини янада кучайтириш масалалари бор”, дейди Саида Мирзиёева.

Президент Администрацияси раҳбарига кўра, Ўзбекистон ўзининг инвестициявий салоҳиятини изчил ошириб бормоқда: сўнгги беш йилда мамлакатга 123 миллиард доллар сармоя жалб этилган. Эндиги асосий вазифа – эришилган барча келишувларни иқтисодиёт, бизнес ва жамият фаровонлигига хизмат қиладиган реал лойиҳаларга айлантиришдан иборат.

Эслатиб ўтамиз, аввалроқ Саида Мирзиёева Тошкент инвестиция форуми доирасида Ўзбекистонга ташриф буюрган Россия Бош вазири Михаил Мишустин, АҚШ Эксимбанки президенти Жон Ёванович ҳамда Халқаро молиявий тараққиёт корпорацияси бош ижрочи директори Бен Блек билан учрашган эди.