Saida Mirziyoyeva Xorijiy investorlar kengashi yig‘ilishida qatnashdi

Bugun, 18 iyun kuni O‘zbekiston Prezidenti Administratsiyasi rahbari Saida Mirziyoyeva O‘zbekiston Respublikasi Prezidenti raisligida o‘tgan Xorijiy investorlar kengashining yig‘ilishida ishtirok etdi. Bu haqda Saida Mirziyoyeva o‘zining Telegram-kanalida yozdi.

Uning bildirishicha, yig‘ilishda taraqqiyotning eng muhim yo‘nalishlari – iqtisodiyot, infratuzilma, innovatsiyalar, ta’lim hamda biznes uchun qulay muhit yaratish masalalari muhokama qilingan. 

“Aynan ushbu sohalarga yo‘naltirilgan investitsiyalar, yuqori salohiyatli kadrlar va shaffof qoidalar mamlakatimizning barqaror rivojlanishi, iqtisodiy o‘sishi va xalqimiz farovonligini ta’minlashning mustahkam poydevoridir”, deydi O‘zbekiston Prezidenti Administratsiyasi rahbari.

Shuningdek, Saida Mirziyoyeva hamkorlarga samarali faoliyati hamda aniq amaliy natijalarga qaratilgan qat’iy harakatlari uchun samimiy minnatdorlik bildirgan.

Eslatib o‘tamiz, avvalroq Saida Mirziyoyeva Toshkent investitsiya forumi doirasida O‘zbekistonga tashrif buyurgan Rossiya Bosh vaziri Mixail Mishustin, AQSH Eksimbanki prezidenti Jon Yovanovich hamda Xalqaro moliyaviy taraqqiyot korporatsiyasi bosh ijrochi direktori Ben Blek bilan uchrashgan edi.