Трамп АҚШ ва Эрон келишуви иккинчи босқичга ўтганини айтди

АҚШ Президенти Дональд Трамп Эрон билан тузилаётган келишув жараёни иккинчи босқичга ўтганини маълум қилди. Бу ҳақда у Қатар амири билан учрашув чоғида айтиб ўтди.

“Бизда Эрон билан келишув бор. У муваффақиятли бўлиши керак”, деган Трамп.

Унинг сўзларига кўра, келишувни имзолашнинг кейинги босқичи осонроқ кечиши кутилмоқда.

Журналистлар олдида сўзга чиққан Дональд Трамп яна бир бор АҚШ Эронни тиклаш учун 300 миллиард доллар сарфлаши ҳақидаги маълумотларни рад этган. Унинг таъкидлашича, Вашингтон мамлакат инфратузилмасига қандайдир маблағ киритиш мажбуриятини олмаган.

Томонлар 19 июнь куни Швейцарияда якуний келишувни имзолаши кутилмоқда. Шундан сўнг Теҳрон ва Вашингтон қолган баҳсли масалалар бўйича 60 кун давомида музокаралар олиб боради.

Келишувнинг электрон версияси эса томонлар томонидан бир кун аввал имзоланган.

Эслатиб ўтамиз, аввалроқ Исроил Бош вазири Биньямин Нетаньяху АҚШ Президенти Дональд Трамп билан учрашув ташкил этишга шошилинч уринишлар қилаётгани ҳақида хабар берилгандию. Мақсад – Эрон билан тайёрланаётган урушни тўхтатиш бўйича келишув атрофидаги келишмовчиликларни бартараф этиш.