Аҳвол Эрон билан урушдан олдингидан ҳам ёмонроқ бўлиши мумкин – Обама

АҚШнинг собиқ президенти Барак Обама мамлакат Эрон билан урушдан кейин аввалги ҳолатдан ҳам ёмонроқ вазиятга тушиб қолган бўлиши мумкинлигини билдириб, амалдаги Президент Дональд Трамп сиёсатини танқид қилди. Бу ҳақда у президентлик марказининг расмий очилиши арафасида NBC телеканалига берган интервьюсида сўз очди.

Саволларга жавоб берар экан, Обама Дональд Трампнинг Эронга қарши ҳарбий амалиёт бошлаш қарорини шубҳа остига олган.

“Биз уруш олиб бордик, миллиардлаб доллар сарфладик, армиямизга катта юк туширдик. Кўплаб одамлар ҳалок бўлди ва ҳозир қарасак, уруш бошланишидан олдинги нуқтага қайтгандекмиз, ҳатто эҳтимол ундан ҳам ёмонроқ аҳволдамиз”, деган у.

Собиқ президент АҚШ ва Эрон ўртасида имзоланган ўзаро англашув меморандумини ижобий баҳолаган. Шу билан бирга, у ўз президентлиги даврида тузилган Эрон ядровий келишувини эслаб ўтган.

“Эрон ядровий қурол яратмасликка рози бўлган эди. Бироқ бу маъмурият ёки унинг аввалги кўриниши ушбу келишувдан чиқиб кетди. Бу эса Эроннинг ядровий салоҳиятини янада оширишга олиб келди”, дейди у.

Маълумот учун, Дональд Трамп биринчи президентлик муддати даврида, 2018 йилда 2015 йилги Эрон ядровий келишувидан чиққан эди. Мазкур келишув Теҳроннинг ядровий қурол яратиш имкониятини чеклашга қаратилган чораларни ўз ичига олган.

Обама суҳбат давомида мамлакатдаги сиёсий муҳит ҳақида ҳам тўхталиб ўтган. Унинг фикрига кўра, ҳозир АҚШ қутблашув ва беқарорлик даврини бошдан кечиряпти ҳамда кўпчилик мамлакатнинг демократия, фуқаролик қадриятлари ва ўзаро муносабати емирила бошлаганини ҳис қилмоқда. Обаманинг айтишича, янги президентлик маркази одамларга ўтмишни эмас, балки ҳар бир инсонда мавжуд бўлган фуқаролик масъулиятини эслатиб туриши керак.

“Ҳар биримиз ҳукумат самарали ишлаши учун масъулият ҳиссига эгамиз. Сайланган амалдорларнинг жавобгарлигини таъминлашда ҳаммамиз ўз ҳиссамизни қўшишимиз керак”, деган АҚШнинг собиқ президенти.

Эслатиб ўтамиз, аввалроқ АҚШнинг собиқ президенти Барак Обама ўзга сайёраликлар мавзусида ҳам Трамп билан турли фикрларга боргани хабар қилинганди.