Швейцарияда аҳоли сони 10 млн киши билан чекланиши мумкин

Бугун, 14 июнь куни Швейцарияда аҳоли сонини чеклаш бўйича референдум ўтказилмоқда. Мамлакат фуқаролари бир вақтнинг ўзида иккита муҳим масалани – умумий фуқаролик хизмати ислоҳоти ва аҳоли сонини чеклаш масаласини ҳал қилмоқда. Энг кўп муҳокама қилинаётган бандлардан бири – 2050 йилдан кейин аҳоли сонининг юқори чегарасини 10 миллион киши этиб белгилаш ташаббуси. Бу ҳақда Швейцария ҳукуматининг расмий веб-сайтида хабар берилди.

Қайд этилишича, ушбу ташаббус уй-жой танқислиги ва инфратузилмага тушаётган юкламанинг ортиб бориши фонида юзага келган. Ҳозирги вақтда Швейцарияда 9 миллиондан ортиқ киши истиқомат қилмоқда ва аҳоли оқимининг амалдаги суръати сақланиб қолса, таклиф этилаётган лимит 2050 йилдан анча олдин бузиб ўтилади.

Швейцариянинг олий ижроия ҳокимият органи ҳисобланган Федерал кенгаш ушбу ташаббусга қарши овоз беришга чақирмоқда. Апрель ойида ҳукумат хорижликлар томонидан кўчмас мулк сотиб олинишининг янада қатъий қоидалари лойиҳасини тақдим этган ва ушбу ташаббусни бўлажак референдум билан боғлаган.

Ишбилармон доиралар эса овоз беришнинг ижобий натижаси Швейцариянинг ишчи кучидан фойдаланиш имкониятларини чеклаб қўйиши мумкинлигидан огоҳлантирмоқда. Ҳозирги кунда аҳолининг тўртдан бир қисмидан кўпроғини чет эл фуқаролари ташкил этади, уларнинг 82 фоиздан ортиғи Италия, Германия, Португалия ва Франциядан борганлар.

Аҳоли сонининг ўсиши уй-жойга бўлган талабнинг ошишига ва нархларнинг кескин кўтарилишига сабаб бўлган. “Wüest Partner” консалтинг компанияси маълумотларига кўра, Цуг шаҳридаги уй-жойлар энди Женевадагидан қимматроқ. Женевадаги элита кўчмас мулклар эса, “Knight Frank” компаниясининг 2026 йилги ҳисоботига кўра, Сингапур, Лондон, Нью-Йорк, Токио ва Париждагидан ҳам юқори баҳоланган.