АҚШ ва Эрон 24 соат ичида тинчлик шартномасини имзолаши мумкин – Шаҳбоз Шариф

АҚШ ва Эрон ўртасидаги тинчлик шартномасининг якуний келишуви яқин 24 соат ичида амалга ошиши кутилмоқда. Бу ҳақда бугун, 13 июнь куни Покистон Бош вазири Шаҳбоз Шариф ўзининг Х ижтимоий тармоғидаги саҳифасида маълум қилди.

“Биз тинчлик битимига ҳар қачонгидан ҳам яқинроқмиз. Якуний келишув яқин 24 соат ичида амалга ошиши кутилмоқда ва Покистон шундан сўнг дарҳол тинчлик шартномасини электрон шаклда имзолашга тайёргарлик кўрмоқда”, деб ёзди у.

Покистон Бош вазирининг сўзларига кўра, имзолаш жараёнидан кейин техник даражадаги музокаралар бўлиб ўтади. У “бу тарихий тинчлик битими мустаҳкам тинчлик учун барқарор пойдевор яратишини” қўшимча қилган.

Эслатиб ўтамиз, 11 июнь куни АҚШ Президенти Дональд Трамп Вашингтон ва Теҳрон урушни тугатиш бўйича келишиб олганини ва томонларга фақат шартномани имзолаш қолганини баён қилган эди. Шунингдек, у шартномани имзолаш ушбу дам олиш кунларидаёқ содир бўлиши мумкинлигини қайд этганди.

Эртаси куни “Mehr” манбаларга таяниб, АҚШ билан ўзаро англашув меморандуми лойиҳасининг 14 та бандини ошкор қилди. Рўйхатдан урушни тугатиш, санкцияларни бекор қилиш, Ҳормуз бўғозини очиш ва бошқалар жой олган. Шу билан бирга, Ташқи ишлар вазирлиги вакили меморандум матни устида ҳали қўшимча ишлар олиб борилишини қайд этган.

Эрон Ташқи ишлар вазири Аббос Ароқчининг сўзларига кўра, Эрон ва АҚШ ўртасидаги ўзаро англашув меморандумига мувофиқ, томонлар бир-бирларининг суверенитетини ҳурмат қилиш ва ички ишларларига аралашмаслик мажбуриятини олади.