Туркияда ўзбекистонлик келин эри ва чақалоғи билан ҳалок бўлди

Кеча, 11 июнь куни Туркиянинг Истанбул шаҳрида содир бўлган даҳшатли йўл-транспорт ҳодисаси оқибатида ўзбекистонлик келин эри ва 2 ойлик чақалоғи билан бирга ҳалок бўлди. Бу ҳақда “Hurriyet” хабар берди.

Нашрнинг ёзишича, ҳодиса Чекмекўй мавзесидаги Шимолий Мармара автойўлида соат 06:00 атрофида юз беган. Сабиҳа Гўкчен аэропортидан қайтаётган Содиқ Гунден (29 ёш) бошқарувидаги енгил машина худди шу йўналишда ҳаракатланаётган юк машинасининг орқасидан бориб урилган. Тўқнашув оқибатида енгил машина юк машинасининг тагига кириб кетган. Ҳайдовчи Содиқ Гунден, унинг ўзбекистонлик рафиқаси Азиза Ҳатамова Гунден (31 ёш) ва уларнинг 2 ойлик чақалоғи Тимур Хон Гунден машина ичида қисилиб қолган. Улар воқеа жойига етиб борган ўт ўчирувчилар томонидан чиқариб олинган. Бироқ оиланинг уч аъзоси ҳам ҳодиса жойида ҳаётдан кўз юмган.

Маълум бўлишича, Санжактепа мавзесида истиқомат қилган ва 4 йилдан бери бирга яшаётган Содиқ ва Азиза Гунден жуфтлигининг Саид Гунден исмли 3 ёшли яна бир фарзанди бор. Оила воқеа тонгда содир бўлгани сабабли уни ўзлари билан бирга олмаган. Чақалоқ Тимур Хон яқиндагина суннат қилинган ва яқин кунларда унинг суннат тўйи ўтказилиш режалаштирилган.

Эслатиб ўтамиз, аввалроқ Истанбул шаҳрининг Фотиҳ тумани Лалели мавзесидаги трамвай бекатида юз берган бахтсиз ҳодиса оқибатида 6 ёшли ўзбекистонлик бола вафот этганди. У трамвайдан тушганидан сўнг бекат ва трамвай рельслари оралиғида қисилиб қолган ҳамда транспортнинг ҳаракатланиши оқибатида оғир тан жароҳати олиб, воқеа жойида ҳаётдан кўз юмган.