Бангладешда қизамиқдан 459 бола ўлди

Бангладешда қизамиқ касаллиги кескин тарқалиб кетди. Жорий йилнинг март ойи ўрталаридан буён касаллик оқибатида 459 нафар бола вафот этган. Бу ҳақда “Daijiworld Media” хабар берди.

Кеча, 18 май куни яна олти нафар боланинг ўлими қайд этилган. Улардан бирининг ўлими расман қизамиқ билан боғлангани тасдиқланган, қолган беш ҳолат эса касаллик билан боғлиқ бўлиши мумкинлиги айтилмоқда.

Мамлакат Соғлиқни сақлаш вазирлиги маълумотига кўра, Бангладешда қизамиқдан ўлимнинг 75 та лаборатория тасдиқлаган ҳолати ва 384 та гумон қилинаётган ҳолат қайд этилган.

Бир суткада қизамиқ билан касалланишнинг тасдиқланган 240 та янги ҳолати аниқланиб, жами беморлар сони 7,7 мингга етган. Гумон қилинаётган янги юқтириш ҳолатлари эса 1274 тага кўпайиб, умумий сон қарийб 58 мингни ташкил қилган.

Март ойидан бери мамлакат бўйлаб шифохоналарга қизамиқ аломатлари билан 42 мингдан ортиқ бемор ётқизилган. Расмийларга кўра, уларнинг аксарияти даволаниб чиқарилган.

Пойтахт Даккадаги эпидемиологик вазият вакцина харидидаги узилишлар учун масъулларни жазолаш талаби билан ўтаётган намойишлар фонида янада мураккаблашмоқда.

Эслатиб ўтамиз, аввалроқ Бангладешда тез тарқаладиган қизамиқ касаллиги оқибатида юздан ортиқ бола ҳалок бўлганди.