АҚШ Сенати Эрон билан урушни тўхтатиш ҳақидаги резолюцияни рад этди

АҚШ Сенати Эрондаги ҳарбий ҳаракатларни тўхтатишни назарда тутган резолюцияни қабул қилмади. Ҳужжатга кўра, Конгресс расман рухсат бермагунча урушни давом эттириш тақиқланиши керак эди. Бу ҳақда “The New York Times” хабар берди.

Резолюцияни 47 сенатор қўллаб-қувватлаган, 52 нафари қарши чиққан, яна бир сенатор овоз беришда қатнашмаган. Ҳужжат Демократлар партияси вакиллари томонидан ишлаб чиқилган бўлиб, бу йил ичида илгари сурилган тўртинчи шундай ташаббус ҳисобланади. Барчаси Сенатда рад этилган, чунки кўпчилик ўринлар Республикачилар партияси назоратида.

Республикачилар орасида фақат Рэнд Пол (Кентукки) резолюцияни қўллаб-қувватлаган. Демократлардан эса, Жон Феттерман (Пенсильвания) қарши овоз берган.

АҚШ Конституциясига кўра, уруш эълон қилиш ҳуқуқи Конгрессга тегишли. Бироқ кўплаб америкалик сиёсатчилар бу қоида қисқа муддатли ҳарбий амалиётларга ёки мамлакатга бевосита таҳдид мавжуд бўлган ҳолатларга тўлиқ тааллуқли эмас, деб ҳисоблайди.

Жорий йилнинг март ойи бошида Конгресс АҚШнинг ҳар икки палатаси – Вакиллар палатаси ва Сенат Дональд Трампга Эронга қарши операцияни Конгресс розилигисиз олиб боришни тақиқлашга қаратилган резолюцияни ҳам рад этган эди. Ўшанда 53 сенатор ва Вакиллар палатасининг 219 аъзоси ҳужжатга қарши овоз берган.

Эслатиб ўтамиз, аввалроқ Трамп яқин икки кун ичида Эрон билан янги музокаралар ўтказилиши мумкинлигини маълум қилганди. Унинг айтишича, учрашув Покистонда бўлиб ўтиши эҳтимоли юқори, чунки бу жараёнда Покистон воситачилик қилмоқда.