Эрондаги энг катта кўприк йўқ қилинди (видео)

АҚШ Президенти Дональд Трамп АҚШ ва Исроил кучлари Эрондаги стратегик муҳим кўприк – Теҳрон билан Караж шаҳарларини боғловчи B1 автомагистралидаги кўприкни йўқ қилганини маълум қилди. Бу ҳақда у ўзининг Truth Social тармоғида ёзиб қолдирди.

Унинг айтишича, бу кўприк бутунлай ишдан чиққан ва энди фойдаланилмайди.

Хабарларга кўра, кўприкка икки марта зарба берилган ва жиддий шикастланган. Алборз вилояти ҳокими биринчи ҳужум оқибатида 2 киши ҳалок бўлганини, яна бир неча киши жароҳат олганини билдирган.

Трамп Эронни тезроқ келишувга боришга чақириб, акс ҳолда яна кучли зарбалар берилишини айтган. У агар Теҳрон келишувга рози бўлмаса ва Ҳормуз бўғозини очмаса, АҚШ Эроннинг электр станциялари, нефть конлари ва Харг оролини тўлиқ йўқ қилиш билан таҳдид қилган.

Шу билан бирга, айрим маълумотларга кўра, Трамп урушни тўхтатишга ҳам тайёрлигини билдирган, ҳатто Ҳормуз бўғози тўлиқ очилмаса ҳам. Бироқ Теҳрон АҚШ талабларини рад этишда давом этмоқда ва ўз шарти сифатида Ҳормуз бўғози устидан суверенитетини тан олишни талаб қилмоқда.

Эслатиб ўтамиз, аввалроқ АҚШ Президенти Дональд Трамп мурожаатида Эрон билан ҳарбий операция деярли барча мақсадларга эришгани ва яна 2–3 ҳафта давом этишини маълум қилганди. Президентнинг таъкидлашича, Эрон аллақачон ўзининг флотидан ва ҳарбий-ҳаво кучларидан маҳрум бўлган.