Эрон делегациясининг бир қисми АҚШ визасини ололмади

Футбол бўйича Эрон миллий терма жамоаси делегациясининг бир қисми, жумладан, мураббийлар штаби аъзолари 2026 йилги Жаҳон чемпионати олдидан АҚШ визаларини ололмаган. Бу ҳақда Туркиядаги Эрон элчихонасига таяниб, “Agence France-Presse” хабар берди. 

Жорий йилнинг 3 июнь куни Эроннинг Туркиядаги элчиси Муҳаммад Ҳасан Ҳабибуллозода миллий терма жамоа футболчилари Жаҳон чемпионатида иштирок этиш учун виза олганини маълум қилганди. Бугун, 6 июнь куни эса АҚШнинг Туркиядаги элчиси Том Барак Эрон жамоаси ўйинчилари ва ёрдамчи ходимлари визаларни қўлга киритганини тасдиқлади. Бироқ Эрон элчихонаси айрим муаммолар сақланиб қолаётганини маълум қилган.

“Нега терма жамоа раҳбариятининг катта қисми, мураббийлар штаби аъзолари, техник маслаҳатчилар ва жамоанинг ажралмас қисми бўлган бошқа шахсларга виза берилмаганини айтмаяпсиз?” деб ёзган Эроннинг Туркиядаги элчиси Х тармоғида.

Эрон томони мазкур қарорни “қасддан камситишга асосланган муносабатнинг юқори даражадаги кўриниши”, деб баҳолаган.

Эрон терма жамоаси гуруҳ босқичидаги учала ўйинини ҳам АҚШ ҳудудида ўтказади. Жамоа Бельгия, Миср ва Янги Зеландия терма жамоалари билан бир гуруҳдан ўрин олган.

24 май куни Халқаро футбол федерацияси (FIFA) Эрон терма жамоасининг Жаҳон чемпионати учун базасини АҚШдан Мексикага кўчириш ҳақидаги қарорни маъқуллаган эди.

Маълумот учун, 2026 йилги Жаҳон чемпионати жорий йилнинг 11 июндан 19 июлга қадар АҚШ, Мексика ва Канадада бўлиб ўтади. Турнир тарихида илк бор 48 та миллий терма жамоа иштирок этади.