“Гўзал Туркистон, сенга не бўлди?” Эрдўған Чўлпондан шеър ўқиди (видео)

Туркия Республикаси Президенти Ражаб Тойиб Эрдўған кеча, 15 декабрь куни “Адолат ва тараққиёт” партияси Конгресс марказида ўтказилган “АК Партия Турк Дунё­си Визён Ҳужжати Тақдимот Дастури”да иштирок этиб, Абдулҳамид Сулаймон ўғли Чўлпоннинг “Гўзал Туркистон” шеъридан ўқиб берди. Жараён “Haber Global”да эфирга узатилган.

UNESKO томонидан эълон қилинган 15 декабрь – Бутунжаҳон туркий тиллар оиласи куни сифатида илк бор БМТ даражасида нишонланаётганини таъкидлаган Президент  турк дунёсининг ва ер юзининг турли бурчакларида бир хил тилда гаплашадиган, бир хил орзуни орзу қиладиган, қалблари бирга уриб турган инсонларни ушбу сана билан қутлаган.

Туркия етакчиси босқин ва зулм чидаб бўлмас даражага етган 1930-йилларда Ўзбекистоннинг мард фарзанди Абдулҳамид Сулаймон ўғли Чўлпон кейинчалик ўққа тутилиб, ҳаёти билан бадал тўлашига сабаб бўлган шеърини тадбир иштирокчиларига ўқиб берган.

Гўзал Туркистон, сенга не бўлди? 
Саҳар вақтида гулларинг сўлди. 
Чаманлар барбод, қушлар ҳам фарёд,
Ҳаммаси маҳзун. Бўлмасми дил шод? 
Билмам не учун қушлар учмас боғчаларингда?

Эрдўған сўзини давом эттирар экан, сўнгги икки аср нафақат Туркия, балки бутун турк дунёси учун ҳам қийинчиликлар, азоб-уқубатлар, машаққатлар ва босқинлар билан ўтганини эслаган.

Таъкидлаш жоизки, Ражаб Тойиб Эрдўған чиқишларида шеър ўқишни ҳуш кўрадиган етакчилардан. У 2018 йилда Ўзбекистонга қилган давлат ташрифи доирасида Олий Мажлис Қонунчилик палатаси ва Сенати аъзолари билан учрашувни Ўзбекистон халқ шоири, Ўзбекистон қаҳрамони Эркин Воҳидовнинг “Ўзбегим” қасидасининг туркча таржимасини айтиш билан бошлаб, депутат ва сенаторларнинг олқишига сабаб бўлган эди.