Россия Трампнинг чақириғига қарши чиқди

Украинада дарҳол ўт очишни тўхтатишга чақириқлар АҚШ Президенти Дональд Трамп ва Россия раҳбари Владимир Путин ўртасидаги Аляскада бўлиб ўтган учрашувда эришилган келишувларга зид келади. Бу ҳақда Россия Ташқи ишлар вазири Сергей Лавров Эфиопия ТИВ раҳбари Гидеон Тимотеос билан биргаликда ўтказган матбуот анжуманида маълум қилди.

Лавровга кўра, Украина Президенти Владимир Зеленскийнинг “европалик ҳомий ва хўжайинлари” АҚШни ўз позициясини ўзгартиришга ва “узоқ муддатли келишувга эришишга” интилмасликка ундамоқда. Унинг таъкидлашича, бу ёндашув Аляскадаги учрашув чоғида Трамп ва Путин “можарога сабаб бўлган омилларни муҳокама қилиш” борасида келишиб олган нуқтаи назарига бутунлай зид.

“Трамп томонидан ҳозир шундай фикр янграмоқда: дарҳол тўхташ керак, бошқа ҳеч нарсани муҳокама қилиш шарт эмас, тўхтаймиз ва кейин тарих баҳо беради. Агар шунчаки тўхтаб қолсак, бу можаронинг асл сабабларини унутиш дегани. Ахир Трамп ҳокимиятга келганида АҚШ маъмурияти бу сабабларни аниқ тушунганди”, деган Лавров. 

Россия вазирининг иддао қилишича, дарҳол ўт очишни тўхтатиш Украинанинг катта қисми “нацист режими” қўлида қолишига олиб келади. 

Эслатиб ўтамиз, Дональд Трамп 17 октябрь куни Украина раҳбари Владимир Зеленский билан музокаралардан сўнг “қотилликларни тўхтатиш ва келишувга эришиш вақти келди”, деб баёнот берган эди. У жанговар ҳаракатларни фронт чизиғи бўйлаб тўхтатишни таклиф қилган. Трампга кўра, Зеленский ва Путин “ғалабаларини эълон қилиши”, сўнгра “тарих ҳукм чиқариши” мумкин. Украина Президенти бу таклифни қўллаб-қувватлаган. Европа етакчилари ҳам фронт чизиғи бўйлаб жангларни тўхтатишга чақирган.

Трамп Зеленский билан учрашишидан олдин эса Путин билан қўнғироқлашганди. У Россия етакчиси билан деярли 2 соат гаплашган. Етакчилар суҳбат давомида Будапештда учрашиб, ҳамма масалани ҳал қилишга келишиб олган эди. Суҳбат Украина уруши тўхташи учун кичик умидларни туғдира бошлаганди, аммо сўнгги хабарлар бор умидни ҳам ўлдирди. ОАВда тарқалаётган хабарларга кўра, Путин ва Трампнинг учрашуви бекор қилинган. Буни етакчилар расман тасдиқламаган бўлса-да, уларга яқин манбалар шунга ишора қилмоқда.