АҚШ ва Канада аэропортларида ҲАМАСни қўллаб-қувватловчи баёнотлар янгради

АҚШ ва Канададаги тўрт аэропортнинг огоҳлантириш тизимлари бузилиб, эфирда Фаластин ҳаракати ҲАМАСни қўллаб-қувватловчи ва АҚШ ҳамда Исроил раҳбарларини танқид қилувчи сўзлар янгради. Бу ҳақда CNN хабар берди.

Қайд этилишича, воқеа Пенсильваниядаги Гаррисберг халқаро аэропорти ҳамда Канададаги Келоуна, Виктория ва Виндзор аэропортларида содир бўлган. Ҳужум оқибатида аэродромлар фаолиятида узилишлар юзага келиб, бир қанча рейслар кечиктирилган.

АҚШ транспорт вазири Шон Даффи бу ҳолатни “мутлақо қабул қилиб бўлмайдиган” деб атаган ва у бу ҳолат йўловчиларни қўрқитишини таъкидлаган. Шунингдек, у Федерал авиация бошқармаси Гаррисберг аэропорти билан ҳамкорликда ушбу хакерлик ҳолатини аниқлаш устида ишлаётганини маълум қилган.

“Кимдир огоҳлантириш тизимига кириб, рухсатсиз аудиоёзувни эфирга узатди. Хабар сиёсий мазмунда эди; аэропорт, авиакомпаниялар ёки йўловчиларга қарши таҳдид мавжуд эмас эди”, дейди Гаррисберг аэропорти матбуот котиби.

Нашрга кўра, ҳодиса бўйича тергов ишлари давом этмоқда.