Венесуэлада АҚШ ҳужуми оқибатида 100 киши ҳалок бўлди

АҚШнинг Венесуэлага қилган ҳужуми оқибатида 100 киши ҳалок бўлди. Бу ҳақда Венесуэла Ички ишлар вазири Диосдадо Кабельо сўзларига таяниб, “Reuters” хабар берди.

Вазирнинг айтишича, қурбонлар асосан ёшлар бўлган. 

“Бу хиёнаткорона ҳужум бўлди. Ҳозирги пайтда 100 нафар одам ўлдирилгани маълум. Улар ҳаётни энди бошлаган, бу воқеага мутлақо алоқаси бўлмаган ёшлар эди”, деган Кабельо. 

Вазирнинг қўшимча қилишича, Президент Николас Мадуро АҚШ махсус кучлари томонидан қўлга олиниши чоғида оёғидан жароҳат олган, биринчи хоним Силия Флорес эса бошидан жароҳатланган.

АҚШ расмийлари маълумотига кўра, Каракасга уюштирилган ҳужум давомида тахминан 75 киши ҳалок бўлган. Улар орасида тинч аҳоли вакиллари, шунингдек Венесуэла ва Куба хавфсизлик кучлари ходимлари бўлган. Бундан ташқари, бир нечта америкалик ҳарбийлар ҳам яраланган.

Колумбияда эса АҚШ билан бўлган тўқнашувларда 32 нафар фуқаро ҳалок бўлгани ҳақида хабар берилган. Гавана расмийларининг баёнотига кўра, улар Венесуэла сўровига биноан вазифаларни бажараётган бўлган.

Қайд этиш жоиз, Президент ва унинг рафиқасининг жароҳат олгани ҳақида CNN ҳам хабар қилганди. Телеканал маълумотига кўра, 5 январь куни Нью-Йоркда бўлиб ўтган суд мажлисида Флореснинг боши боғланган, Мадуро эса ўтириб-туришда қийналган. Аёлнинг адвокати унинг кучли лат ейиши ёки қовурғалари цинган бўлиши мумкинлигини айтган.

Николас Мадуро ва Силия Флорес 3 январга ўтар кечаси Венесуэлада ўтказилган АҚШнинг “Мутлақ қатъият” номли операцияси давомида қўлга олиниб, АҚШга олиб кетилган. Операция 2 соат 20 дақиқа давом этган.

Сиёсатчи ва унинг рафиқасига “наркотерроризм, гиёҳванд моддалар контрабандаси ва қурол сақлаш” айбловлари қўйилган. Венесуэла расмийлари ушбу воқеани ҳарбий тажовуз деб атаган.

Эслатиб ўтамиз, аввалроқ Венесуэла АҚШ томонидан мамлакатга ҳужум уюштирилган ва Президент Николас Мадуро ўғирлаб кетилган пайтда ҳалок бўлган ҳарбийлар учун бир ҳафталик мотам эълон қилганди.