Венесуэла АҚШнинг тажовузи фонида БМТдан ёрдам сўради

Венесуэла АҚШнинг тажовузи фонида БМТ Хавфсизлик Кенгашидан ёрдам сўради. Бу ҳақда мамлакатнинг БМТдаги доимий вакили Самуэль Монкада Кенгаш йиғилишида маълум қилди.

Венесуэла ташаббуси билан чақирилган йиғилишда Каракас АҚШ томонидан “яқин орада қуролли ҳужум эҳтимоли” мавжудлигини билдирган.

“Биз бугун бу ерга АҚШ ҳукуматидан ўзининг халқаро мажбуриятларига риоя этишни талаб қилиш учун келдик”, деган Монкада йиғилишда.  

У БМТ Хавфсизлик Кенгашига икки давлат ўртасидаги вазиятни назорат остида сақлаш учун учта чорани таклиф қилган:

• АҚШнинг Кариб ҳавзасида олиб бораётган ҳарбий ҳаракатларига алоқадор халқаро тинчлик ва хавфсизликка таҳдид мавжудлигини тан олиш;
• жойлардаги вазиятнинг янада ёмонлашувига йўл қўймаслик учун зарур чораларни кўриш;
• АҚШни ҳам ўз ичига олган ҳолда, барча Кенгаш аъзолари Венесуэла суверенитетига ҳурмат билан қарашга мажбур бўладиган резолюция қабул қилиш.

АҚШнинг БМТдаги вақтинчалик вакили Жон Келли йиғилишда унинг мамлакати Венесуэла халқига қарши эмаслигини, у ўзини қонуний ҳукумат орқали ифода этиш ҳуқуқига эга эканини айтган. У, шунингдек, АҚШ Президенти Дональд Трамп маъмурияти олдинроқ илгари сурган айбловларни такрорлаб, Венесуэла Президенти Николас Мадуро “гиёҳванд моддалар савдосига алоқадор “Қуёш картели” террористик тармоғининг раҳбари эканини, АҚШ ва Европага нисбатан наркотрафикка жавобгар”лигини билдирган. Келлининг айтишича, Мадуро ушбу картель фаолиятини амалга ошириш учун давлат институтларини коррупцияга ботирган.

Монкада эса бу айбловларни “ҳеч қандай далилсиз илгари сурилмоқда” деб изоҳлаган.

Эслатиб ўтамиз, аввалроқ “The New York Times” ўз манбаларига таяниб, Дональд Трамп Венесуэла билан барча дипломатик алоқаларни узишни буюргани, бу эса наркокартелларга ёки Венесуэла Президенти Николас Мадуронинг ҳукуматига қарши эҳтимолий ҳарбий ҳаракатлар учун йўл очиши ҳақида хабар берган эди.