Ливан Ғарб кўмаги билан “Ҳизбуллоҳ”ни қуролсизлантирмоқчи

Бугун, 18 декабрь куни Франция, Саудия Арабистони ва АҚШ расмийлари Парижда Ливан армияси қўмондони билан “Ҳизбуллоҳ” гуруҳини қуролсизлантириш механизмини амалга ошириш бўйича йўл харитасини якунлашга қаратилган музокаралар ўтказади. Бу ҳақда “Reuters” хабар берди.

Маълумки, Исроил ва Ливан 2024 йилда АҚШ воситачилигида ўт очишни тўхтатиш бўйича келишувга эришган, бироқ Исроил Ливан армиясининг “Ҳизбуллоҳ”ни қуролсизлантиришга қаратилган саъй-ҳаракатларига шубҳа билан қарамоқда. Исроил ҳарбий авиацияси эса Ливан жанубида, ҳатто пойтахт Байрутда ҳам “Ҳизбуллоҳ” нишонларига зарбаларни кучайтирди.

Дипломатларга кўра, 2026 йилда Ливанда ўтказиладиган парламент сайловлари яқинлашар экан, сиёсий келишмовчиликлар ва партиялар ўртасидаги рақобат мамлакатдаги беқарорликни кучайтириши мумкин. Бу эса президент Жозеф Ауннинг “Ҳизбуллоҳ”ни қуролсизлантириш масаласида қатъий чоралар кўришига тўсқинлик қилиши мумкин.

“Вазият ниҳоятда нотинч ва қарама-қаршиликларга бой. Порох бочкасини портлатиш учун кўп вақт талаб этилмайди”, дейди исмини ошкор қилмасликни сўраган юқори лавозимли расмийлардан бири. 

Унинг сўзларига кўра, Аун қуролсизлантириш жараёнини очиқча олиб боришни истамайди, чунки бу мамлакат жанубидаги шиа жамоаси билан зиддиятга ва кескинликнинг кучайишига олиб келиши мумкин.

Манбаларга кўра, Ливан армиясининг “Ҳизбуллоҳ”ни мустақил равишда қуролсизлантириш имкониятлари чекланган. Шу сабабли, мавжуд сулҳ механизмини Франция, АҚШ ва эҳтимол бошқа ҳарбий мутахассислар ҳамда БМТ тинчликпарвар кучлари иштирокида мустаҳкамлаш таклиф этилмоқда. Томонлар келгуси йил бошида Ливан армиясини кучайтириш бўйича халқаро конференция, шунингдек, айниқса Ливан жанубини қайта тиклашга қаратилган алоҳида анжуман ўтказишга умид қилмоқда.

Ливан давлат ахборот агентлиги NNА хабарига кўра, 18 декабрь куни Парижда музокаралар бўлиб ўтаётган бир пайтда Исроил Ливан жанубидаги бир қатор шаҳарлар ҳамда Бекаа водийси ҳудудларига ҳаво ҳужумларини уюштирди. Исроил ҳарбийлари Ҳизбуллоҳга тегишли бўлган, машғулотлар ўтказиш, қурол сақлаш ва артиллерия ўқлари учун фойдаланилган ҳарбий объектларга зарба берилганини маълум қилди. Уларнинг таъкидлашича, мазкур объектлар Исроил ва Ливан ўртасидаги ўзаро келишувларни бузган ҳамда Исроил хавфсизлигига таҳдид солган.

Шунингдек, Исроил армияси Ливан жанубидаги Тайбе ҳудудида “Ҳизбуллоҳ” вакилига зарба берилганини билдирди. Парламент спикери ва “Ҳизбуллоҳ” иттифоқчиси бўлган Амал ҳаракати етакчиси Набиҳ Берри ушбу ҳужумларни Париждаги конференцияга йўлланган “Исроил хабари” сифатида баҳолади.

Эслатиб ўтамиз, аввалроқ Исроил Ливан жанубидаги “Ҳизбуллоҳ” объектларига зарба бергани ҳақида хабар берилганди. Нишонга олинган объектлар орасида “Ҳизбуллоҳ”нинг қурол омборлари, ракета қурилмалари ҳамда ушбу ҳудудда инфратузилмани тиклаш имконини берадиган муҳандислик асбоб-ускуналари сақланган инфратузилма объектлари бор экани билдирилди.