Ғазо тинчлик режасини кўз ёшлар билан қаршилади (фото, видео)

Аввалроқ, Исроил ва ҲАМАС Мисрда бўлиб ўтган музокараларда тинчлик режасининг биринчи босқичи бўйича келишувга эришгани хабар берилганди. Икки йиллик бомбардимонлардан чарчаган Ғазо аҳолиси ўт очишни тўхтатиш тўғрисидаги келишувни нишонлаш учун кўчаларга чиқди.

Ғазо аҳолиси тун бўлишига қарамасдан, икки йиллик қонли тўқнашувлар сўнгги нуқтага етганини нишонлаш учун кўчаларга чиққан. Улар ўзларидаги ҳаяжон ва ҳис-туйғуларни видеога олиб, ижтимоий тармоқларда жойлаштирган. 

Видеолар орқали кўриш мумкинки, одамлар шиорлар айтиб, рақсга тушмоқда. Ёш болакайлар ҳам катталарга қўшилган ҳолда бу улкан “байрам”ни нишонлаш учун чиққан. 

Ҳудудда фаолият олиб бораётган журналистлар ҳам уларнинг қувончини ОАВга сиздирмоқда. Репортажлар тайёрланиб, баъзи журналистлар устларидаги ҳарбий кийимларни ечиб ташлаган – бу урушнинг якунланиш босқичига етганини кўрсатади. 

Қайд этиш жоиз, 8 октябрь кечаси АҚШ Президенти Дональд Трамп ўзининг ижтимоий тармоғида Исроил ва ҲАМАС ўртасида битимнинг биринчи босқичи бўйича келишувга эришилганини эълон қилди. Унинг сўзларига кўра, яқин орада гаровдагилар уйларига қайтади, Исроил эса ўз қўшинларини “келишилган чизиқ” ортига олиб чиқади. Трамп бу воқеани “араб ва мусулмон дунёси, Исроил, барча қўшни давлатлар ҳамда АҚШ учун буюк кун” деб атаган.

Сўнгги маълумотларга кўра, ҲАМАС томонидан гаровга олинган 20 нафар исроиллик 13 октябрь куни қайтарилади.

Битим бўйича музокаралар Мисрнинг Шарм-ал-Шайх шаҳрида бўлиб ўтди. Музокараларда Қатар, Миср ва Туркия воситачилик қилди, АҚШ эса миллий хавфсизлик бўйича маслаҳатчилар ва Яқин Шарқ бўйича махсус вакиллари орқали иштирок этди.