Эрон “қизил чизиқ”ни кесиб ўтмоқда – Трамп

АҚШ Президенти Дональд Трамп Теҳрон АҚШнинг ҳарбий ёки тижорат объектларига ҳужум қиладиган бўлса, Эрон мисли кўрилмаган даражада кучли зарбаларга дуч келишини айтди. Бу ҳақда у бугун, 12 январь куни журналистлар билан мулоқотда маълум қилди.

Трампнинг сўзларига кўра, агар Эрон бундай ҳужумни амалга оширса, АҚШ шундай куч билан жавоб берадики, Теҳрон бунга ишониши ҳам қийин бўлади. У Вашингтон ихтиёрида жуда кучли ва қатъий чоралар мавжудлигини таъкидлаган. Президент, шунингдек, Эрон “қизил чизиқ”ни кесиб ўтаётганини билдириб, АҚШ бу ҳолатга жавоб бериш вариантларини, жумладан ҳарбий чораларни ҳам кўриб чиқаётганини айтган.

Шу билан бирга, Трамп АҚШ барибир Гренландияни “у ёки бу йўл билан” қўлга киритишини яна бир бор такрорлаб, акс ҳолда буни Россия ёки Хитой қилиши мумкинлигини даъво қилган. У ўзини НАТОни “сақлаб қолган” етакчи сифатида кўрсатиб, агар АҚШ альянсдан чиқса, бу НАТО учун жиддий зарба бўлишини айтган.

Қайд этиш жоиз, Трампнинг дағдағалари фонида Эрон Президенти Масъуд Пезешкиён халққа мурожаат қилиб, норозилик билдираётган фуқароларга иқтисодий ислоҳотлар давом этишини ва мавжуд муаммолар ҳал қилинишини ваъда қилган. У мамлакатдаги тартибсизликларни ташкил этишда АҚШ ва Исроилни айблаган ҳамда фуқароларни тартибсизликларга қарши кўчаларга чиқишга чақирган.

Маълумот учун, Эронда норозилик намойишлари декабрь ойининг охирида миллий валютанинг кескин қадрсизланиши ва нархларнинг ошиши фонида кучайди. Марказий банк раҳбари Муҳаммад Фарзин истеъфога чиқди, унинг ўрнини Абдолносер Хеммати эгаллади. Ризо Паҳлавийнинг чақириқларидан сўнг мамлакатда ҳукуматга қарши шиорлар остида оммавий намойишлар бўлиб ўтди, айрим ҳудудларда хусусий мулк ва шаҳар инфратузилмасига зарар етказилди. Олий раҳбар Оятуллоҳ Али Хоманаий намойишчиларни “бузғунчилар” деб атади, мамлакатда интернет ўчирилди ва ОАВ бир муддат ахборот бермади.

Эслатиб ўтамиз, аввалроқ АҚШ сенатори Линдси Грэм Эрон халқига мурожаат қилиб, уларга Америка томонидан ёрдам бораётганини айтганди.

“Узоқ давом этган даҳшатли тушингиз тез орада тугайди, ёрдам аллақачон йўлда. Сизнинг зулмга чек қўйишдаги жасоратингиз ва қатъиятингиз АҚШ Президенти ва эркинликни севувчи барча инсонлар томонидан эътироф этилди.

Президент Трамп “Эронни яна буюк қиламиз” деганда, Эрондаги намойишчилар Оятуллоҳ устидан ғалаба қозониши кераклигини англатади. Трамп Оятуллоҳ ва унинг шериклари ҳокимият тепасида экан, Эрон ҳеч қачон буюк бўла олмаслигини тушунади”, дея ёзган сенатор.