Ризо Паҳлавий Оятуллоҳни ағдариш учун Трампдан кўмак сўради

Эроннинг сўнгги шоҳи Муҳаммад Ризо Паҳлавийнинг ўғли – Ризо Паҳлавий АҚШ Президенти Дональд Трампдан мамлакатидаги оммавий норозилик намойишларига аралашиб, Оятуллоҳ режимини ағдаришда ёрдам беришни сўради. Бу ҳақда Паҳлавий ўзининг Х саҳифасида ёзиб қолдирди.

Шаҳзода норозилик намойишларига чиққан фаоллар кучайиб бораётган қийинчиликлар билан юзлашаётганини таъкидлаган. 

“Халқ бугун нафақат ўқ-дориларга, балки алоқа узилиши ва интернет, телефон алоқасининг тўлиқ тўхтатилишига дуч келмоқда”, деган Паҳлавий.

Шаҳзода одамларни сон жиҳатидан устунликка эга бўлиб, хавфсизлик кучларига қарши чиқиб, озодлик учун курашишга чақирган. У Трампдан ёрдам сўраб мурожаат қилган, аммо Ғарбий оммавий ахборот воситалари қайд этишича, Трамп Ризо Паҳлавийнинг намойишлар етакчиси сифатидаги даъвосини очиқ қўллаб-қувватламаяпти.

Қайд этиш жоиз, Ризо Паҳлавийнинг отаси, Шоҳ Муҳаммад Ризо Паҳлавий 1979 йилда ағдарилган ва унинг ўғли ҳам тахтдан қуруқ қолган. 

Маълумот учун, мамлакатда оммавий намойишлар 28 декабрдан буён давом этмоқда. Улар Теҳрондаги марказий бозорда бошланган бўлиб, кўплаб дўкон эгалари гиперинфляция ва нархларнинг кескин ошишига норозилик сифатида савдо шохобчаларини ёпган.

29 декабрь куни Эрон миллий валютаси – риял тарихий минимум даражага тушди: бир риял тахминан 0,00002 еврога тенг бўлди. Жаҳон банки маълумотига кўра, октябрь ойида Эронда озиқ-овқат инфляцияси 64,2 фоизни ташкил этган. Бу кўрсаткич бўйича мамлакатни антирейтингда фақат Жанубий Судан ортда қолдирган.

Эрон Миллий хавфсизлик олий кенгаши тартибсизликларни АҚШ ва Исроил томонидан уюштирилган, дея баҳолаган. 

Эслатиб ўтамиз, Ризо Паҳлавий бутун мамлакат аҳолисини 8 ва 9 январь соат 20:00 да бир вақтнинг ўзида намойишга чиқишга чақирганди. Шаҳзода халққа қилган мурожаатида уларнинг ҳафта давомида қилган намойишларини кузатганини, “зўравон режим”нинг босимига қарамай халқнинг курашаётганини эътироф этган.