“Бизга нима қилиш кераклигини ўргатма”. Куба Президенти Трампга мурожаат қилди

АҚШ Президенти Дональд Трамп Куба давлатига энди Венесуэладан нефть ва пул бормаслигини маълум қилди. Бу ҳақда Оқ уй раҳбари кеча, 11 январь куни ўзининг Truth Social тармоғида ёзиб қолдирди.

Трампнинг айтишича, Куба узоқ йиллар давомида Венесуэладан олаётган нефть ва молиявий ёрдамдан энди маҳрум бўлади. Трамп бу ёрдам эвазига Куба Венесуэладаги сўнгги икки “диктатор”га хавфсизлик хизматлари кўрсатиб келганини, бироқ энди бу амалиёт тугаганини таъкидлаган. Унинг сўзларига кўра, Венесуэла энди “бандитлар ва товламачилар” ҳимоясига муҳтож эмас, чунки мамлакатни бундан буён АҚШ армияси ҳимоя қилади.

“Энди Кубага на нефть, на пул келади – ноль. Жуда кеч бўлиб қолмасдан туриб, уларга келишув тузишни қатъий тавсия қиламан”, дея ёзган Трамп. 

Бунга жавобан Куба Ташқи ишлар вазирлиги Куба ҳеч қачон ва ҳеч бир давлатдан хавфсизлик хизматлари эвазига пул ёки моддий компенсация олмаганини билдирган. ТИВ раҳбари Бруно Родригес Паррильянинг айтишича, АҚШдан фарқли ўлароқ, Кубада ёлланма аскарлик, шантаж ёки бошқа давлатларга нисбатан ҳарбий босим билан шуғулланувчи ҳукумат йўқ. У ҳуқуқ ва адолат Куба томонида эканини, АҚШ эса нафақат Куба ва минтақа, балки бутун дунё тинчлиги ва хавфсизлигига таҳдид солаётган “жиноятчи гегемон” сифатида ҳаракат қилаётганини таъкидлаган.

Куба Президенти Мигель Диас-Канель эса мамлакат 66 йилдан бери АҚШ тажовузига учраб келаётганини айтган. У Кубани эркин, мустақил ва суверен давлат деб атаб, ҳеч ким мамлакатга нима қилишни буюра олмаслигини билдирган. Президентнинг сўзларига кўра, Куба ҳеч кимга ҳужум қилмайди, бироқ 66 йилдан бери АҚШ босимига дуч келмоқда ва ватанини охирги томчи қонгача ҳимоя қилишга тайёр.

Қайд этиш жоиз, январь ойи бошида Венесуэла Президенти Николас Мадуро ва унинг рафиқаси АҚШ томонидан қўлга олинганидан сўнг, Трамп Кубага ҳам таҳдид қилган, мамлакатни “жуда аянчли аҳволда” деб атаган. Шунингдек, у Колумбияни ҳам танқид қилиб, Президентини кокаин ишлаб чиқаришда айблаган. Бир неча кундан кейин Трамп яна Кубанинг “соч толаси билан осилиб тургани” ва “катта муаммога дуч келгани”ни айтган. Куба расмийлари эса Мадуро ағдарилгач, АҚШнинг Каракасдаги операцияси вақтида Куба қуролли ва разведка кучларига мансуб 32 нафар кубалик ҳалок бўлганини маълум қилган.

Эслатиб ўтамиз, аввалроқ АҚШ Давлат котиби Марко Рубио Венесуэла расмийларидан Россия, Куба, Хитой ва Эрондан келган маслаҳатчиларни мамлакат ҳудудидан чиқариб юборишни талаб қилганди.