Трамп Венесуэла билан дипломатик алоқаларни узишни буюрди – ОАВ

АҚШ Президенти Дональд Трамп Венесуэла билан барча дипломатик алоқаларни узишни буюрди, бу эса наркокартелларга ёки Венесуэла Президенти Николас Мадуронинг ҳукуматига қарши эҳтимолий ҳарбий ҳаракатлар учун йўл очади. Бу ҳақда ўз манбаларига таяниб, “The New York Times” хабар берди.

Нашрнинг ёзишича, Николас Мадуро ва бошқа расмийлар билан музокараларни АҚШ Президентининг махсус вакили Ричард Гренелл олиб борган. Бироқ ўтган ҳафта Дональд Трамп унга қўнғироқ қилиб, барча дипломатик алоқаларни, шу жумладан, музокараларни ҳам тўхтатишни талаб қилган.

Трамп Мадуронинг АҚШнинг “ҳокимиятдан ихтиёрий равишда воз кечиш” талабини бажармаслигидан ва венесуэлалик расмийларнинг наркосавдога алоқадорликларини рад этишда давом этаётганидан норози бўлган.

Америкалик расмийларнинг айтишича, Трамп маъмурияти бир нечта ҳарбий сценарийларни ишлаб чиққан, улар орасида Мадурони ҳокимиятдан четлаштиришга қаратилган операциялар ҳам бор. Николас Мадуро эса АҚШнинг мақсади “қўғирчоқ ҳукумат яратиш” ва Венесуэланинг табиий бойликларини эгаллаш эканини айтган.

Эслатиб ўтамиз, жорий йилнинг сентябрь бошида АҚШ Президенти Кариб денгизининг жанубий қисмига саккизта ҳарбий кема юборган эди. У бу ҳаракатни “наркотрафикка қарши кураш” деб изоҳлади. Николас Мадуро эса АҚШ ҳаракатларини “душманона қамал” деб атаб, БМТдан “мамлакат ҳудудий яхлитлиги ва суверенитетини ҳимоя қилишга кўмаклашишни” сўради. Бунга жавобан Оқ уй раҳбари Венесуэланинг наркотик ташиётган кемасини АҚШ ҳарбийлари Кариб денгизида чўктирганини маълум қилди.