Венесуэла АҚШга “бўйин эгишни” бошлади

Делси Родригес бошчилигидаги Венесуэла муваққат ҳукумати кеча, 9 январь куни  берган баёнотида АҚШ билан дипломатик алоқаларни кенгайтириш имкониятларини ўрганишни бошлаган. Шу доирада АҚШ Давлат департаменти вакиллари техник ва логистика баҳолаш ишларини олиб бориш учун Каракасга ташриф буюрган. Бу ҳақда “Reuters” нашри хабар берди.  

АҚШ Давлат департаментининг баёнотида айтилишича, америкалик расмийлар Жанубий Америка давлатида АҚШ элчихонаси фаолиятини босқичма-босқич қайта тиклаш эҳтимолини кўриб чиқмоқда. 

Маълумки, Вашингтон ва Каракас ўтган ҳафта АҚШнинг шов-шувли ҳарбий амалиёти ортидан Венесуэла Президенти Николас Мадуро қўлга олинганидан сўнг, ҳамкорликка тайёр эканлигини билдирган. Шундан сўнг унинг вице-президенти Делси Родригес мамлакатнинг муваққат раҳбари сифатида ҳокимиятни ўз қўлига олган. 

“Венесуэла ҳукумати АҚШ ҳукумати билан дипломатик миссияларни икки давлатда ҳам қайта тиклашни кўзлаб, синов (эксплорация) жараёнини бошлашга қарор қилди,” дейилади Венесуэла ҳукумати баёнотида. 

Шунингдек, Венесуэла томони баҳолаш ишларини олиб бориш учун АҚШга ҳам ўз делегациясини юборишини маълум қилган. 

Эслатиб ўтамиз, аввалроқ муваққат президент Делси Родригес АҚШ ҳамда минтақадаги бошқа давлатлар билан тенглик ва суверенитетни ҳурмат қилиш тамойилларига асосланган халқаро муносабатларни ривожлантиришни устувор вазифа сифатида белгилашини айтиб ўтганди.