Қирғизистонда чегарачи қўлга олинди (видео)

Миллий хавфсизлик давлат қўмитаси Қирғизистондаги “Оқ-Жол” назорат-ўтказиш пункти чегарачисини қўлга олди. Бу ҳақда АКИpress хабар берди.

Жорий йилнинг 17 сентябрь куни Чегара хизмати ҳарбий хизматчиси И.Т. ва чет эл фуқароси Ф.Б.га нисбатан Қирғизистон Жиноят кодексининг 337-моддаси (мансаб ваколатини суиистеъмол қилиш) ва 338-моддаси (давлат чегарасини ноқонуний кесиб ўтиш”) билан қўзғатилган жиноят иши доирасида чегарачи ҳамда унинг “мижози” бўлган чет эл фуқароси ушланган.

Тергов маълумотларига кўра, хорижлик чегарачи кўмагида рухсатномасиз давлат чегарасини ноқонуний кесиб ўтган.

Улар Миллий хавфсизлик давлат қўмитасининг вақтинчалик сақлаш ҳибсхонасига жойлаштирилди.

Эслатиб ўтамиз, аввалроқ Миллий хавфсизлик давлат қўмитаси Бишкек шаҳрининг Биринчи май туманидаги Маёвка муниципал ҳудудий бирлашмасидаги қишлоқ хўжалиги ерларини тураржой қурилишига ноқонуний айлантириш билан боғлиқ коррупцион схемани фош қилганди.